Դատարանը Հայաստանի նախկին գլխաւոր դատախազ, Քննչական կոմիտէի նախկին նախագահ՝ Աղուան Յովսէփեանը երկու ամիսով կալանաւորելու որոշում կայացուցած է՝ բաւարարելով Յատուկ քննչական ծառայութեան (ՅՔԾ) միջնորդութիւնը, «Ազատութիւն»-ին հաղորդած են ՅՔԾ-էն։
Յովսէփեան երէկ ձերբակալուած էր փողերու լուացման, կաշառք ստանալու եւ խարդախութեամբ գոյք յափշտակելու մեղադրանքով:
Ըստ իրաւապահներուն, 68-ամեայ Յովսէփեանը, որ 2004-ին դատախազի, ապա Քննչական կոմիտէի նախագահի պաշտօններ գրաւած է, պաշտօնավարման տարիներուն օրինականացուցած է աւելի քան 1 միլիառ 300 միլիոն դրամ, մասնակցած է ձեռնարկատիրական գործունէութիւն կատարող շարք մը ընկերութիւններու կառավարման, ստացած է առանձնապէս խոշոր չափերով` 190 միլիոն դրամ կաշառք եւ խարդախութեամբ յափշտակած է 800 միլիոն դրամ գոյք։ Թէ ինչ ընկերութիւններու եւ գոյքի մասին է խօսքը, իրաւապահները չեն բացայայտած։
Նախկին գլխաւոր դատախազի պաշտպան՝ Գագիկ Խաչիկեան երէկ յայտարարած է, որ Յովսէփեանը մեղադրանքը չ’ընդունիր եւ մարտական տրամադրուած է: Այսօր ան տեղեկացուց, որ դատարանի որոշումը պիտի բողոքարկուի «բոլոր հնարաւոր եղանակներով»։
