Հայաստանի ֆութպոլի ազգային հաւաքականը Եւրոպայի Ազգերու Լիկայի երրորդ դասակարգի երկրորդ ենթախումբի վերջին մրցումին յաղթեց Հիւսիսային Մակեդոնիային եւ պատմութեան մէջ առաջին անգամ ըլլալով դարձաւ ենթախումբի յաղթող:
«Արմէնփրես» կը հաղորդէ որ, հանդիպման առաջին վայրկեաններուն երկու խումբերը փոխանակած են յարձակումները, սակայն առաջին կիսախաղին վիճակագրական առաւելութիւնը եղած է Հիւսիսային Մակեդոնիայի կողմը: Անոնք կը տիրէին գնդակին՝ 66-34 տոկոս յարաբերակցութեամբ:
Առաջին կիսախաղի ընթացքին բերդի գրաւում չարձանագրուեցաւ:
Երկրորդ կիսախաղի 54-րդ վայրկեանին ստանալով Վահան Բիչախչեանի ճշգրիտ փոխանցումը` Յովհաննէս Համբարձումեանը գնդակը ուղարկեց Հիւսիսային Մակեդոնիայի բերդը:
Այս կոլէն ետք Հիւսիսային Մակեդոնիայի խումբը մեծ ուժերով անցաւ յարձակումներու, սակայն ապարդիւն:
Հայաստանի պաշտպան Կամօ Յովհաննիսեան շատ լաւ առիթ ունէր կրկնապատկելու առաւելութիւնը, սակայն չկարողացաւ օգտագործել ստեղծուած պահը եւ խաղը աւարտեցաւ 1-0 արդիւնքով՝ յօգուտ Հայաստանի:
Այս յաղթանակին շնորհիւ Հայաստանի հաւաքականը գրաւեց ենթախումբի առաջին տեղը եւ յաջորդ մրցաշարին հանդէս պիտի գայ երկրորդ դասակարգի մէջ՝ աւելի ուժեղ երկիրներու հետ: