ՀՀ վարչապետ Նիկոլ Փաշինեան համոզուած է, որ պետական համակարգին մէջ ներկայիս, ծրարով աշխատավարձ ստանալու դէպքեր չկան եւ պէտք չէ ըլլան: Վարչապետը կոչ կ’ուղղէ նման բան նկատելու պարագային անպայման յայտնել: Փաշինեան այս մասին վստահեցուցած է Ազգային Ժողովին մէջ, կառավարութեան անդամներու հետ հարց ու պատասխանի ժամանակ, պատասխանելով Լուսաւոր Հայաստան խմբակցութեան պատգամաւոր Մանէ Թանդիլեանի հարցումին:
Մանէ Թանդիլեանը նկատեց, որ բազմաթիւ հրապարակումներ եղած են այն մասին, որ պետական համակարգի մէջ ծրարով աշխատավարձ ստանալու դէպքեր արձանագրուած են: Ան յիշեց, որ կառավարութեան ծրագիրը ներկայացուցած ժամանակ Ազգային Ժողովի ամպիոնէն վարչապետ Փաշինեան նշած էր, որ պարգեւավճարներ ստացող պաշտօնեաները ծրարով փող ստացած են: Պատգամաւորը հետաքրքրուած է, թէ արդեօք այս երկու տարուայ ընթացքին իրաւապահ մարմինները զբաղած են վարչապետի այդ յայտարարութեամբ եւ արդեօք նման քորուփցիա բացայայտուած է: Նաեւ թէ արդեօք նման հնարաւոր դէպքերու մասին վարչապետը հարցուցած է իր կառավարութեան նախարարներուն:
Փաշինեան նշեց, վարչապետի պաշտօնը ստանձնելէն յետոյ այնքան յայտարարութիւններ ըրած է, որ իրաւապահ մարմինները ակնյայտօրէն չեն հասցուցած անոնցմով զբաղիլ: Եւ ինքն ալ քանի անգամ իր դժգոհութիւնը յայտնած է, որ իրաւապահ մարմինները ամբողջ ծաւալով չեն կատարեր այն հակաքորուփցիա քաղաքականութիւնը, որ ինք կ’ակնկալէ: «Ինչ վերաբերուում է այսօրուայ կառավարութեան անդամներուն, ես նախարարներուն հարցաքննելու սովորութիւն չունեմ եւ ցանկութիւն էլ չունեմ: Եւ, երբ ի վերջոյ իրաւապահ մարմինները այնքան արդիւնաւէտ կը լինեն, որ կը հասցնեն իմ բոլոր յայտարարութիւններով զբաղուել, կարծում եմ, որ դա կը նշանակի, որ մենք համակարգային լուրջ յաջողութիւններու ենք հասել»,-ըսաւ վարչապետը ու շեշտեց, որ յանձնարարելու կարիք չկայ, որ իրաւապահ մարմինները պէտք է անով զբաղին:
Ան նկատեց, որ նման գործընթաց կրնայ տեղի ունենալ երկու մարդու միջեւ, եւ այդ գործընթացներու բացայայտման հետ կապուած ամէն ինչ չէ, որ հեշտ է: «Յամենայնդէպս այն պահին, երբ ես նման յայտարարութիւնն արել եմ եւ դրանից էլ շատ առաջ, այդ երեւոյթն արդէն իսկ դադարեցուած է եղել, բացառուել է նման երեւոյթի գոյութիւնը: Եւ եթէ յանկարծ այդպիսի տեղեկութիւններ ունենաք, խնդրում եմ անպայման յայտնէք դրա մասին: Այդպիսի բան չկայ եւ չպէտք է լինի»,-վստահեցուց Փաշինեանը: