ՀՀ վարչապետ Նիկոլ Փաշինեանի եւ «Ծառուկեան Դաշինքի» ղեկավարի Գագիկ Ծառուկեանի միջեւ օր մը առաջ կնքուած յուշագիրէն ետք, 16 հանրապետականեր եւս միացան Դեկտեմբերին արտահերթ խորհրդարանական ընտրութիւներ կայացնելու Փաշինեանի առաջարկին:
Հանրապետական խմբակցութեան եւս երկու պատգամաւոր՝ Աւետ Սարգսեանը եւ Ռաֆիկ Գրիգորեանը միացած են խորհրդարանին մէջ ընթացող ստորագրահաւաքին՝ ի պաշտպանութիւն Դեկտեմբերին արտահերթ ընտրութիւններ իրականացնելու վարչապետի նախաձեռնութեան: Այսպիսով ստորագրահաւաքին մասնակցած պատգամաւորներուն թիւը հասած է 16-ի:
«Վարչապետի պաշտօնից Փաշինեանի հրաժարականից յետոյ մինչեւ արտահերթ ընտրութիւնները նոր վարչապետ չպէտք է ընտրուի եւ գործող խորհրդարանը պէտք է լուծարուի», – ըսուած է ստորագրահաւաք յայտարարութեան մէջ:
Օր մը առաջ, վարչապետ Նիկոլ Փաշինեանն ու «Ծառուկեան» խմբակցութեան ղեկավար Գագիկ Ծառուկեանը արտահերթ խորհրդարանական ընտրութիւնները Դեկտեմբերին կայացնելու մասին յուշագիր ստորագրած էին: Ծառուկեանը յայտարարած էր, որ ամբողջութեամբ կը սատարէ Նիկոլ Փաշինեանին:
Վարչապետի եւ Ծառուկեանի հանդիպման ժամանակ քննարկած են հայաստանեան ներքաղաքական զարգացումները, այդ շարքին՝ խորհրդարանական արտահերթ ընտրութիւններու իրականացման առնչուող հարցեր:
Նիկոլ Փաշինեանին սատարելու մասին յայտարարած էր նաեւ Հանրապետական խմբակցութեան պատգամաւոր, Ազգային ժողովի պետաիրաւական հարցերու յանձնաժողովի նախագահ, նախկին գլխաւոր դատախազ Գէորգ Կոստանեանը:
Հոկտեմբեր 10-ին ՀՀ նախագահ Արմէն Սարգսեան հանդիպումներ ունեցած է վարչապետ Նիկոլ Փաշինեաի եւ Ազգային Ժողովի նախագահ Արա Բաբլոյեանի հետ:
Վարչապետի աշխատակազմի տեղեկատւութան եւ հասարակայնութեան հետ կապերու բաժինէն փոխանցուած տեղեկութիւններովª հանդիպման ընթացքին քննարկուած են Հայաստանի ներքաղաքական իրավիճակին եւ զարգացումներուն, ներառեալ՝ խորհրդարանական արտահերթ ընտրութիւններու իրականացման առնչուող հարցեր:
«Համաձայնած էինք մեր հեռախօսազրոյցներու, նաեւ Փարիզի մէջ մեր հանդիպման ժամանակ, որ պէտք է հանդիպինք: Հանդիպած եմ արդէն նաեւ պարոն Բաբլոյեանի հետ եւ պիտի ուզէի քննարկել ներքաղաքական իրավիճակը»,- ըսած էր ՀՀ նախագահ Արմէն Սարգսեան:
«Իսկապէս շատ կարեւոր է, որ այս իրավիճակը քննարկենք նաեւ հանրապետութեան նախագահին հետ: Ըստ էութեան, հիմա կրնամ ըսել, որ վերջին օրերուն տեղի ունեցաւ քանի մը իրադարձութիւն, որոնք կարծես կը տանին դէպի հանգուցալուծում: Մասնաւորապէս, երէկ «Բարգաւաճ Հայաստան» կուսակցութեան նախագահ Գագիկ Ծառուկեանի հետ յուշագիր ստորագրեցինք՝ Դեկտեմբերին խորհրդարանական արտահերթ ընտրութիւններ իրականացնելու վերաբերեալ, եւ եւս 16 պատգամաւոր գրաւոր յայտարարութեամբ պաշտպանած են այդ նախաձեռնութիւնը: Կը կարծեմ, որ, ըստ էութեան, կ՛ընթանանք լարուածութիւնը թօթափելու ճանապարհով, որ դրական է»,- ըսած է Նիկոլ Փաշինեան.
ՀՀ նախագահ Արմէն Սարգսեան նաեւ նշած է, «Ես նոյնպէս շատ ուրախ եմ, որ սկզբունքօրէն, ինչպէս նախապէս նշած էի, ընթացքը տեղի ունենայ երկխօսութեան եւ հանդուրժողականութեան մթնոլորտի մէջ: Ուրախ եմ լսելու, որ վերջին 1-2 օրուան ընթացքին բանակցութիւններու, երկխօսութեան ճանապարհով որոշ արդիւնք ձեռք բերուած է, եւ որ հաւանաբար հանգուցալուծումը հեռու չէ: Շատ կարեւոր է, որ այդ հանգուցալուծումը տեղի ունենայ»: