Վրաստանի նախագահի թեկնածու Սալոմէ Զուրապիշվիլին Ջաւախք կատարած նախընտրական այցի ընթացքին պնդած է, թէ նախկին նախագահ Միխէիլ Սահակաշվիլին խտրական մօտեցում ունէր հայերու եւ թուրքերու հանդէպ:
«Նախկին նախագահը վրացական քաղաքացիութիւն կը շնորհէր թուրքերուն, որոնք բնակութիւն կը հաստատէին Բաթումիի մէջ եւ մինչեւ այդ որեւէ կապ չէին ունեցած Վրաստանի հետ: Նախկին նախագահը թուրքերուն քաղաքացիութիւն կը բաժնէր, իսկ ձեզի` ոչ», -յայտարարած է Սալոմէ Զուրապիշվիլին:
Վրացական ընդդիմութիւնը, որ հիմնական բաղկացած է Սահակաշվիլիի նախկին եւ ներկայ կողմնակիցներէն, բաւական ջղային արձագանգած է Զուրապիշվիլիի` ջաւախահայերու հետ հանդիպումներու ժամանակ հնչեցուցած այս յայտարարութիւններուն:
«Մենք եւս մէկ անգամ համոզուեցանք, որ տիկին Զուրապիշվիլին մեր պետութեան թշնամին է: Ինչպէ՞ս կրնաս դուն երկրի նախագահի պաշտօն զբաղեցնել, երբ ազգային փոքրամասնութեան ներկայացուցիչներուն կը դիմես նման յայտարարութիւններով, երբ քու երկրիդ հայազգի քաղաքացիներուն կ’ըսես, թէ նախկին իշխանութիւնը թուրքերուն քաղաքացիութիւն կը շնորհէր, իսկ հայերուն`ոչ», – ըսած է Միխէիլ Սահակաշվիլիի հիմնադրած «Ազգային միացեալ շարժում» կուսակցութեան ղեկավարներէն Նիքա Մելիան:
Ընդդիմադիր «Եւրոպական Վրաստան» կուսակցութեան կողմէն նախագահի թեկնածու առաջադրուած Դաւիթ Պաքրաձէն եւս համոզուած է, որ երկրի բարձրագոյն պաշտօնին յաւակնող անձի կողմէն նման յայտարարութիւններ հնչեցնելը երկրի մէջ ազգամիջեան ատելութիւն սերմանելու նպատակ ունի:
«Այդ յայտարարութիւնները հիմնազուրկ են եւ որեւէ առնչութիւն չունին նախագահի դիրքորոշման հետ: Եթէ տիկին Զուրապիշվիլին բարի ըլլար լսել այդ մարդոց, ան կը հասկնար,որ խնդիրը Արդարադատութեան նախարարութեան դիրքորոշման մէջ է», – նշած է Պաքրաձէն` յատուկ յիշեցնելով, որ ջաւախահայերու քաղաքացիութեան խնդիրը ողջ սրութեամբ ի յայտ եկաւ «Վրացական երազանքի» իշխանութեան տարիներուն:
Պաքրաձէն, ի դէպ, այս հարցի առումով մասամբ իրաւացի է: Երկքաղաքացիութիւնը բացառող դրոյթը Վրաստանի հիմնական օրէնքին մէջ տեղ գտաւ Միխէիլ Սահակաշվիլիի նախագահութեան վերջին տարիներուն իրականացուած սահմանադրական փոփոխութիւններու արդիւնքով: Անոր հետեւանքով, սակայն, թէ՛ վրացական եւ թէ՛ հայկական կամ ռուսական անձնագիր ունեցող ջաւախահայերը ծանր ընտրութեան առաջ կանգնեցան արդէն «Վրացական երազանքի» իշխանութեան տարիներուն` 2012 թուականէն ետք: Պաշտօնական տուեալներու համաձայն 2012-2018 թուականներուն սահմանադրական փոփոխութիւններու հետեւանքով Վրաստանի քաղաքացիութենէն շուրջ 30 հազար մարդ հրաժարած է: Անոնց 80 տոկոսը ազգութեամբ հայեր էին:
Այժմ արդէն հայերէն շատերը կ’ուզեն վերադարձնել վրացական քաղաքացիութիւնը: անոնց նման կոչով դիմած է նաեւ Սալոմէ Զուրապիշվիլին: «Երկքաղաքացիութիւնը այլեւս արգիլուած չէ, ուստի այսօրուընէ կրնաք դիմում ներկայացնել քաղաքացիութեան վերականգնման վերաբերեալ: Ուղղակի պէտք է տարրական վրացերէնի եւ երկրի պատմութեան վերաբերեալ գիտելիքներու տիրապետել», – յայտարարած է նախագահի թեկնածուն:
