Ֆրանսան վստահ է, որ հայաստանեան ներքաղաքական զարգացումները իրենց անդրադարձը պիտի չունենան Երեւանի մէջ նախատեսուած Ֆրանքոֆոնիայի գագաթնաժողովին վրայ, եւ Հայաստանը պատշաճ կերպով պիտի իրականացնէ այդ միջոցառումը՝ «Ազատութեան» հարցին ի պատասխան ըսած է Հայաստանի մէջ Ֆրանսայի արտակարգ եւ լիազօր դեսպան Ժոնաթան Լաքոթը:
«Ցանկացած դեսպանութիւն միշտ ուշադիր է այն երկրի ներքաղաքական իրադարձութիւններու նկատմամբ, ուր կը գործէ: Բնականաբար, մենք չենք խառնուիր ներքաղաքական զարգացումներուն: Կապի մէջ եմ հայաստանեան ընթացիկ իրադարձութիւններու բազմաթիւ մասնակիցներու հետ, եւ մենք կը հաւատանք, որ Հայաստանը պիտի հիւրընկալէ Ֆրանքոֆոնիայի գագաթնաժողովը»,-ըսած է դեսպանը՝ շարունակելով․ – «Եկող շաբաթ ամբողջ աշխարհը պէտք է հանդիպի Երեւանի հետ: Հայաստանի համար սա պատմական իրադարձութիւն է, եզակի հնարաւորութիւն՝ շփուելու, կապ հաստատելու ֆրանքոֆոն աշխարհի հետ: Մենք կը հաւատանք, որ գագաթնաժողովը լաւագոյն կերպով կ’ընթանայ Հայաստանի մէջ»:
11-12 Հոկտեմբերին Երեւանի մէջ պիտի կայանայ Ֆրանքոֆոնիայի 17-րդ գագաթնաժողովը, եւ Հայաստանի արտաքին գործոց նախարարութեան համաձայն, երեկուայ դրութեամբ իրենց մասնակցութիւնը յաստատած են 26 պետութեան ղեկավարներ, 2 երկիրներու փոխնախագահներ, Մոնաքոյի արքայազնը, 9 վարչապետեր, 3 փոխվարչապետներ: Կը սպասուի, որ գագաթնաժողովին մասնակցելու համար Երեւան ժամանեն շուրջ 3 հազար 500 հոգի:
Գագաթնաժողովին մասնակցելու համար Երեւան պիտի ժամանէ նաեւ Ֆրանսայի նախագահ Էմանուէլ Մաքրոնը, եւ անոր այցը միաժամանակ պիտի ըլլայ Ֆրանսայի նախագահի պետական այցը՝ Հայաստան: