Թրքական պատկան մարմինները հերքած են Վան նահանգի Էտրեմիթ շրջանին մէջ հայկական գերեզմանատան վրայ հանրային զուգարան կառուցելու մասին թրքական մամուլի մէջ տարածուած լուրերը:
«Ճումհուրիէթ» պարբերականի հաղորդմամբ, օրերս Էտրեմիթի իշխանութիւնները Տիլքայա գիւղին մէջ հանրային լողափ բացած են, որուն հարեւանութեամբ ալ զուգարան, լոգանքի խցիկ եւ ինքնաշարժներու կայանատեղի կառուցած են: Թերթը կը գրէ, որ առաջին աստիճանի պահպանութեան տարածք ճանչցուած այս վայրին մէջ հայկական գերեզմանատուն եղած է: Շինարարական աշխատանքներու ընթացքին հողէն մարդկային ոսկորներ դուրս հանուած են:
Էտրեմիթի քաղաքապետարանը, սակայն, կը պնդէ, որ տարածքին մէջ հայկական գերեզմանատուն չկայ եւ լողափին յարակից ոչ մէկ շինութիւն կառուցուած է:
«Տարածքին մէջ շինարարութիւն չէ կատարուած, միայն լողափին մօտ փայտէ խցիկներ ու շարժական զուգարաններ տեղադրուած են: Այստեղ ուրարտական շրջանի մնացորդներ կան: Անոնց վնաս չէ հասցուած, ընդհակառակը, պահպանութեան տակ առնուած եւ բացուած են զբօսաշրջիկներու համար: Տարածուած անհիմն լուրերը սադրիչ բնոյթ ունին», – նշուած է քաղաքապետարանի յայտարարութեան մէջ:
Մինչդեռ Տիլքայա գիւղի 65-ամեայ բնակիչ Վահտեթթին Քոչկուրպուզ «Ճումհուրիէթ»ին պատմած է, որ հանրային լողափի տարածքին իսկապէս հայկական գերեզմանատուն եղած է:
«Ասոնք հայկական հողեր եղած են: 1984 թուականին այստեղ ոսկորներու հաւաքման աշխատանքներ կատարուեցան, սակայն մինչեւ օրս գերեզմանոցէն ոսկորներ դուրս կու գան: Ճիշդ չէ այստեղ լողափ կառուցելը: Գերեզմանատան վրայ զուգարան կառուցելու մասին խօսք չի ալ կրնար ըլլալ», – ըսած է գիւղի բնակիչը: Վերջինիս համագիւղացին նոյնպէս անթուլատրելի համարած է մարդոց ոսկորներու վրայ զուարճանքի, ժամանցի վայր կառուցելու փաստը:
Հայ մեծանուն նկարիչ Արշիլ Կորքիի ծննդավայրը համարուող այս շրջանին մէջ 1984 թուականին Էկեյեան համալսարանը, Վանի թանգարանը եւ Վանի տարածաշրջանի պատմութեան ու հնագիտութեան ուսումնասիրութեան կեդրոնը համատեղ պեղումներ իրականացուցած են: Ուսումնասիրութիւններուն արդիւնքով Տիլքայա բլուրին մէջ ուրարտական շրջանին պատկանող 24 դամբարան եւ շարք մը պատմական գտածոներ յայտնաբերուած են:
