«Սումգայիթեան կոտորածը լայնօրէն դատապարտուեց միջազգային հանրութեան կողմից, այդ թւում, Եւրախորհրդարանի կողմից` համապատասխան բանաձեւի ընդունմամբ: Ցաւօք, այս յանցագործութեան կազմակերպիչներն ու իրագործողները ըստ արժանւոյն պատիժ չկրեցին», – ՄԱԿ-ի Մարդու Իրաւունքներու Խորհուրդի 37-րդ նստաշրջանի բարձր մակարդակով հանդիպման ընթացքին ունեցած իր ելոյթին մէջ յայտարարած է Հայաստանի արտաքին գործոց նախարար Էդուարդ Նալպանտեան:
Իր խօսքին մէջ անդրադառնալով Սումգայիթի ջարդերուն, Նալպանտեանը նշած է` – «Ինչպէս բազմիցս է տեղի ունեցել մարդկութեան պատմութեան ընթացքում, անպատժելիութիւնը բերում է նոր ոճրագործութիւնների, ինչպիսիք էին հայկական կոտորածները եւ էթնիկ զտումները Պաքւում, Կիրովաբադում (Գանձակում), Մարաղայում եւ շատ այլ վայրերում: Ատրպէյճանը դիմում է ամէն միջոցի ձգտելով կոծկել այս ոճրագործութիւնները, խուսափել պատասխանատուութիւնից եւ շեղել ուշադրութիւնը դրանցից‘ շինծու մեղադրանքներով, ներառեալ այսպէս կոչուած Խոջալուի քարոզչական արշաւով, փորձելով իրեն ներկայացնել որպէս զոհ, իսկ հայերին վարկաբեկել նրանց պիտակաւորելով իբր բռնութիւններ իրականացրած կողմ»:
Այս առթիւ Հայաստանի արտաքին գործոց նախարարը նաեւ խօսած է Ատրպէյճանի հակահայկական քարոզչութեան եւ յիշեցուցած է 2016-ի Ապրիլեան իրադարձութիւնները. – «Նմանօրինակ հակահայկական քարոզչութիւնն է, որ հրահրել է հայերի նկատմամբ շարունակական վայրագութիւններ, ներառեալ 2016թ. Ապրիլին Լեռնային Ղարաբաղում Ատրպէյճանի զինուած ուժերի կողմից միջազգային մարդասիրական իրաւունքի կոպտագոյն խախտումները‘ երեխաների, կանանց, ծերերի սպանութիւնները, դիակապտութիւնները, գերեվարուած զինուորների‘ տխրահռչակ ահաբեկչական կազմակերպութիւններին բնորոշ ոճով գլխատումները»:
