Սոցիալ Դեմոկրատ Հնչակեան Կուսակցութեան Կենտրոնական Վարչութիւնը շնորհաւորում է Հայաստանի Հանրապետութեան բոլոր քաղաքացիներին, հերթական արդար, ազատ ու թափանցիկ ընտրութիւնների առթիւ:
Հակառակ աննախադէպ ու բացայայտ արտաքին միջամտութեան, ինչպէս նաեւ ընդդիմադիր մի շարք ուժերի կողմից լայնածաւալ ընտրակաշառքի եւ այլ միջոցների կիրառման, Հայաստանի քաղաքացին իր քուէի ուժով գերադասեց ինքնիշխանութիւնը` գաղութացումից, հարեւանների հետ խաղաղ գոյակցութիւնը` յարատեւ թշնամութիւնից եւ տնտեսական բազմազանութիւնը` մէկ շուկայի կախուածութիւնից:
Այս առթիւ, շնորհաւորում ենք վարչապետ Նիկոլ Փաշինեանին եւ «Քաղաքացիական Պայմանագիր» կուսակցութեան` այս վճռորոշ ընտրութիւններում արձանագրած տպաւորիչ յաղթանակի կապակցութեամբ։ Միաժամանակ ցանկանում ենք արձանագրել, որ վարչապետին ու նրա թիմին եւս մէկ անգամ վստահելով երկրի կառավարման ղեկը՝ Հայաստանի քաղաքացին վերահաստատում է այն իրողութիւնը, որ հայրենիքը գտնւում է ճիշտ ուղու վրայ եւ ակնկալում` խաղաղութեան գործընթացի շարունակութիւն, Եւրոպական Միութեան եւ Միացեալ Նահանգների հետ ռազմավարական ու տնտեսական յարաբերութիւնների խորացում, ինչպէս նաեւ բնակչութեան բարօրութեան ու կենսամակարդակի բարելաւմանն ուղղուած ծրագրերի իրագործում:
Եթէ 2021 թուականի ընտրութիւններին հայրենիքի գլխին Դամոկլեան սրի նման կախուած էր գոյութենական վտանգը, ապա այսօր երկիրն ու տարածաշրջանը յամրաքայլ մտնում են խաղաղութեան ու տնտեսական համագործակցութեան նոր դարաշրջան, ուր Հայաստանին վերապահուած է կարեւոր դերակատարութիւն: Սակայն վերջինս սակայն պահանջում է խելամիտ ու կշռադատուած որոշումներ ե’ւ գործադիր իշխանութեան եւ Ազգային Ժողովի կողմից: Հետեւաբար, լիայոյս ենք, որ թէժ ընտրապայքարի արդիւնքում ձեւաւորուած նոր Ազգային Ժողովը ձեռնամուխ կը լինի արդիւնաւէտ օրէնսդրական աշխատանքի, որտեղ ընդդիմութիւնը եւս իր կարեւոր ներդրումը կÿունենայ, փոխանակ անտեղի հետապնդելու իշխանափոխութեան ամուլ նպատակը:
Ս.Դ. Հնչակեան Կուսակցութեան Կենտրոնական Վարչութիւն
9 Յունիս, 2026
