Պիտի շարունակենք համագործակցութիւնը պաշտպանութեան ոլորտին մէջ, Հայաստանի վարչապետ Նիկոլ Փաշինեանի հետ երկկողմ բանակցութիւններու մեկնարկէն առաջ յայտարարեց Ֆրանսայի նախագահ Էմանուէլ Մաքրոնը:
«Ֆրանսան տուած է իր համաձայնութիւնը պաշտպանական զինտեխնիկայի առաքման համար, եւ Ֆրանսան պիտի շարունակէ այդ ոլորտին մէջ պատասխանատուութեան ոգիով չցանկալով որեւիցէ մագլցում», յայտարարեց Մաքրոնը:
Էմանուէլ Մաքրոն անդրադառնալով Հայաստանի մէջ ԵՄ առաքելութեան գործունէութեան, յայտարարեց՝ «Հայաստանը պէտք է օգտուի խաղաղութեան եւրոպական գործիքներէն»:
«Հայաստանը եւ Եւրոմիութիւնը կը ցանկան նոր գործընկերութեան ժամանակացոյց: Բառերէն այն կողմ Ֆրանսան Հայաստանի կողքին է, որովհետեւ արդարութիւնը, արդարադատութիւնը, ազատութիւնը եւ միջազգային իրաւունքը մեզի համար կարեւոր են»:
Ֆրանսայի նախագահը հաւաստիացուց՝ Հայաստանը կրնայ ապաւինիլ Ֆրանսայի աջակցութեան՝ անոր անկախութեան, տարածքային ամբողջականութեան, ժողովրդավարական ընթացքին եւ խաղաղութեան ձգտումներուն։
«Անհրաժեշտ է որ Ատրպէյճանը փարատէ երկիմաստութիւնը, բարեխիղճ աշխատանք կատարուի սահմաններու սահմանազատման եւ սահմանագծման հարցով, ինչ որ հիմք պիտի ծառայէ սահմանի երկուստէք ուժերու ետքաշման համար», նշեց Էմանուէլ Մաքրոն:
Ֆրանսայի նախագահը Պաքուէն պահանջեց նաեւ ապահովել Լեռնային Ղարաբաղի բնակիչներուն՝ իրենց տուները վերադառնալու իրաւունքը՝ «արագ, անարգել եւ անվտանգ»:
«Անհրաժեշտ է, որ հաղորդակցական ուղիները եւս ըլլան համարկման գործօններ եւ ոչ թէ պառակտման: Ես կը փափաքիմ, որ Կեդրոնական Ասիոյ, Հարաւային Կովկասի եւ Եւրոմիութեան միջեւ հաղորդակցական կապերը զարգանան ու կ’ողջունեմ այս ընդհանուր յաւակնութեան մէջ Ձեր՝ «Խաղաղութեան Խաչմերուկ» նախաձեռնութեան ներդրումը», յաւելած է ան:
Նիկոլ Փաշինեան, անդրադառնալով հայ-ֆրանսական յարաբերութիւններուն վերաբերեալ հնչող քննադատութիւններուն, յայտարարեց՝ Հայաստանի պաշտպանական կարողութիւններուն զարգացումը ոեւէ մէկուն մօտ չի կրնար անհանգստութիւն յառաջացնել:
«Մեր միակ խնդիրը տարածաշրջանում ճիշդ հաւասարակշռութիւն ձեւաւորելն է ու միայն ՀՀ օրինական ինքնիշխան, միջազգային հանրութեան կողմէ ճանաչուած սահմանները, տարածքային ամբողջականութիւնը, անկախութիւնը պաշտպանելն է եւ մեր երկրի դիմադրողականութիւնը բարձրացնելն է», ըսաւ Փաշինեան:
Վարչապետը անդրադարձաւ նաեւ Եւրոմիութեան հետ յարաբերութիւններուն՝ ընդգծեց Ֆրանսայի աջակցութիւն այս գործին մէջ:
«Եւրամիութիւնը մեր երկրի ժողովրդավարական բարեփոխումներում ու հաստատութենական կարողութիւնների զարգացման համար ունի առանցքային նշանակութիւն»:
Հայաստանի վարչապետը Ֆրանսայի նախագահը հրաւիրեց այս տարի Սեպտեմբերին այցելել Հայաստան:
