Սթոքհոլմի մէջ գործող Ընտրական աջակցութեան եւ ժողովրդավարութեան միջազգային հիմնարկի ժողովրդավարական գործընթացներու գնահատման ղեկավար Սիմա Շահը յայտնած է, որ ժողովրդավարութեան էական աճի նոր կեդրոններ ի յայտ եկած են Եւրոպայի մէջ. եւ այդ առումով կարելի է առանձնացնել Մոլտովան, Հայաստանը եւ Սլովենիան, ուր յառաջընթացն ու զարգացումները կը կրեն աշխոյժ բնոյթ։
Սիմա Շահը նման տեսակէտ յայտնած է «Եւրոնիւզ»-ին տուած հարցազրոյցին։
Ան նշած է, որ Հայաստանը կը դասուի այն երկիրներու շարքին, որոնց մէջ արձանագրուած է ժողովրդավարութեան մակարդակի էական աճ։
«Մասնաւորապէս խօսքի ազատութեան իրաւունքի կիրարկման տեսանկիւնէն ամբողջ աշխարհի մէջ կը նկատուի անկում, մինչդեռ Հայաստանի, Մոլտովայի եւ Սլովենիոյ մէջ այդ առումով արձանագրուած է զգալի աճ։ Սլովենիոյ մէջ նոյնիսկ տեղի ունեցաւ հանրաքուէ այն բարեփոխումներուն վերաբերեալ, որոնք կը նպաստեն հանրային հեռարձակման անկախութեան, ինչ որ մեծ յաղթանակ է տեղի լրատուամիջոցներուն համար։ Մոլտովայի մէջ ստեղծուած է նոր դատարան, որուն գործունէութեան տիրոյթին բացարձակապէս փտածութեան գործերու քննումն է, եւ որուն աշխատանքը կը նպաստէ այդ երկրին մէջ փտածութեան մակարդակի նուազման», ըսած է Սիմա Շահը։
Անոր կարծիքով՝ պէտք է կեդրոնանալ այն հիմնարկներու գործունէութեան վրայ, որոնք կ’աջակցին ժողովրդավարական գործընթացներուն, առաւել եւս, որ աշխարհի մէջ տեղի կ’ունենան ժողովրդավարական ընտրութիւններ, կը գործեն ազդեցիկ խորհրդարաններ, կ’ապահովուի հասանելիութիւնը արդարադատութեան։ Ըստ անոր՝ պէտք է սեւեռուն ուշադրութիւն դարձնել գործընթացներու թափանցիկութեան եւ օրէնսդրութիւններու հզօրացման, ինչպէս նաեւ այն միջավայրերուն, որոնց մէջ կը կիրարկուին այդ օրէնսդրութիւնները։
