Թեհրանի մէջ ՀՀ արտաքին գործերու նախարար Արարատ Միրզոյեանի մասնակցութեամբ տեղի ունեցած է տարածաշրջանային խորհրդակցական հարթակի հանդիպումը:
Կը մասնակցէին Իրանի, Ատրպէյճանի, Ռուսաստանի եւ Թուրքիոյ արտաքին գործերու նախարարները:
Վրացական կողմը, ռուսական լրատուամիջոցներուն հաղորդմամբ, հրաժարած է մասնակցելէ հանդիպման։
Հարաւային Կովկասի մէջ համագործակցութեան վեցակողմ ձեւաչափի նախաձեռնութիւնը 2020 թուականի վերջաւորութեան մեկնարկեց Ատրպէյճանի եւ Թուրքիոյ առաջնորդներ Իլհամ Ալիեւի եւ Ռեճեպ Թայիպ Էրտողանի կողմէ, որ հետագային յայտնի դարձաւ որպէս «3+3»: Ռուսաստանը եւ Իրանը ողջունեցին այս գաղափարը, եւ Հայաստանը նոյնպէս միացաւ այդ ձեւաչափին։
Վրաստանը յայտարարած էր, որ չի նախատեսեր մասնակցիլ նախաձեռնութեան։
2021 թուականի Դեկտեմբեր 10-ին Մոսկուայի մէջ տեղի ունեցաւ հինգ երկիրներու արտաքին գործերու փոխնախարարներու մակարդակով խորհրդատուական տարածաշրջանային հարթակի առաջին հանդիպումը։
Վրաստանը ձեռնպահ մնաց 2021 թուականի հանդիպումէն եւ արտաքին գործերու նախարարներու մակարդակով ընթացիկ հանդիպումէն։
Վրաստանի ԱԳՆ-ն յիշեցուցած էր, որ Վրաստանը երբեք չէ մասնակցած նման ձեւաչափով հանդիպումներուն:
Վրաստանի իշխանութիւնները այս դիրքորոշումը կը բացատրեն անով, որ չեն կրնար մասնակցիլ որեւէ ձեւաչափի, ուր Ռուսաստանը կը մասնակցի, քանի դեռ Ռուսաստանի Դաշնութիւնը դուրս չէ բերած իր զօրքերը Ապխազիայէն եւ Հարաւային Օսեթիայէն։
