Հայաստանի մէջ ԵՄ առաքելութեան ղեկավար Մարքուս Ռիթերը եւ Հայաստանի մէջ Եւրոմիութեան դեսպան Անտրէա Վիքթորինը Սիսիանի օդակայանին մէջ ողջունած են Եւրոպական Խորհրդարանի Պաշտպանութեան հարցերով ենթայանձնաժողովի նախագահ Նաթալի Լուազօն եւ SEDE (Եւրոպական Խորհրդարանի Անվտանգութեան եւ Պաշտպանութեան ենթայանձնաժողով) պատուիրակութիւնը։
Ըստ առաքելութեան թուիթըրեան էջին, անոնք այստեղ են՝ միանալու ԵՄ քաղաքացիական առաքելութեան խումբին՝ դէպի Լաչինի միջանցք ծրագրուող պարեկութեան համար:
Նախօրէին Լուազօն հանդիպած է վարչապետ Նիկոլ Փաշինեանի հետ։ Ընդծելով, որ Ատրպէյճանը կը շարունակէ յարձակողական հռետորաբանութիւնն ու զինադադարի խախտման գործելաոճը, ինչ որ կ’աւելցնէ լարուածութիւնը տարածաշրջանին մէջ՝ Փաշինեանը կարեւորած է միջազգային փաստահաւաք առաքելութեան մուտքը Լաչինի միջանցք եւ Լեռնային Ղարաբաղ:
Իր հերթին, Նաթալի Լուազօն ընդգծած է տարածաշրջանին մէջ խաղաղութիւն եւ կայունութիւն ապահովելու, ինչպէս նաեւ լարուածութեան վտանգները նուազեցնելու քայլերուն անհրաժեշտութիւնը: