Մարտ 8-ին, Գահիրէի մէջ գտնուող ՀՀ արտաքին գործերու նախարար Արարատ Միրզոյեան հանդիպում ունեցած է Ազհարի Գերագոյն Իմամ, շէյխ Ահմատ Մոհամմատ Ալ Տայիպիի հետ:
Անդրադառնալով Եգիպտոսի` դարաւոր պատմութիւն ունեցող հայկական համայնքին` զրուցակիցները համաձայնած են, որ այն կարեւոր ներդրում ունեցած է Եգիպտոսի զարգացման մէջ: Գոհունակութիւն արտայայտուած է հայ եւ եգիպտացի ժողովուրդներուն միջեւ փոխադարձ յարգանքի եւ վստահութեան վրայ հիմնուած բարեկամութեան, ինչպէս նաեւ երկու երկիրներու միջեւ զարգացող համագործակցութեան առնչութեամբ, որուն լաւագոյն դրսեւորումն էր Փետրուարին Եգիպտոսի նախագահի առաջին այցը Հայաստան:
Երկուստեք կարեւորուած է կրօնական ու պատմամշակութային հարուստ ժառանգութեան ներկայացման ուղղութեամբ համատեղ նախաձեռնութիւններու կեանքի կոչումը:
ՀՀ արտաքին գործերու նախարարը եւ Ազհարի Գերագոյն Իմամը ընդգծած են ազգային եւ կրօնական հողի վրայ անհանդուրժողականութեան եւ խտրականութեան դրսեւորումներու անթոյլատրելիութիւնը, կարեւորած են ծայրահեղականութան եւ ատելութեան խօսքի դէմ պայքարին ուղղուած ջանքերը:
Անդրադառնալով Հարաւային Կովկասի մէջ ստեղծուած անվտանգային իրավիճակին եւ առկայ մարտահրաւէրներուն` նախարար Միրզոյեան անթոյլատրելի համարած է Ատրպէյճանի կողմէ կրօնական գործօնի շահարկումները, ինչպէս նաեւ Հայաստանի եւ հայ ժողովուրդին ու արաբական աշխարհին միջեւ աւանդական ջերմ յարաբերութիւնները խաթարելու անհիմն փորձերը: Նախարարը անդրադարձած է Ատրպէյճանի կողմվ Լաչինի միջանցքի արգելափակման հետեւանքով Լեռնային Ղարաբաղի մէջ ստեղծուած մարդասիրական ճգնաժամին եւ անոր հանգուցալուծման հրամայականին:
Նախարար Միրզոյեանը զրուցակցին ներկայացուցած է նաեւ Հայաստանի եւ Ատրպէյճանի միջեւ յարաբերութիւններւ կարգաւորման գործընթացի վերջին զարգացումները եւ տարածաշրջանին մէջ խաղաղութիւն հաստատելուն ուղղուած հայկական կողմին ջանքերը եւ Ատրպէյճանի` իրավիճակի ապակայունացման վտանգ պարունակող վերջին օրերու յայտարարութիւնները եւ գործողութիւնները:
Իր հերթին, Գերագոյն Իմամը վերահաստատած է Հարաւային Կովկասի մէջ խաղաղութեան հաստատման վերաբերեալ դիրքորոշումը` վկայակոչելով 2020 թուականի Հոկտեմբերէն ի վեր իր կողմէ կատարուած յայտարարութիւնները: Տարածաշրջանին մէջ ժողովուրդներուն միջեւ հանդուրժողականութեան կոչերու ծիրին մէջ Ահմատ Մոհամմատ Ալ Տայիպը յիշատակած է նաեւ Հայոց Ցեղասպանութեան օրերուն Գերագոյն Իմամ, շէյխ Սելիմի ուղերձը` փրկել հայերը ու չմասնակցիլ կոտորածներուն:
