«Փտածութեան դէմ պայքարը մեզ համար սկզբունքային նշանակութիւն ունի: Եւ մենք որեւէ կերպ այդ պայքարում մեր ջանքերը չենք նուազեցնի», Ազգային ժողով-կառավարութիւն հարց ու պատասխանի ժամանակ ըսաւ վարչապետ Նիկոլ Փաշինեանը: Անոր խօսքով` այն հրապարակումները, որոնք կան, Հայաստանի իրաւապահ մարմիններու կողմէ բացայայտուող դէպքերն են: Այդ բացայայտումները պիտի շարունակուին այնքան, ինչքան նման դէպքեր տեղի կ’ունենան: «Ինչ վերաբերում է ընդդիմութեան հրապարակած փաստերին, բոլոր փաստերով էլ հետաքրքրւում են մեր իրաւապահ մարմինները: Եւ պէտք է վստահեցնեմ, որ չի կարող լինել փտածութեան որեւէ դէպք, որի քննութիւնը պատշաճ ընթացք չի ստանում: Բացառուած է, որ լինի որեւէ փտածութեան դէպք, եւ այդ դէպքը պատշաճ մակարդակով քննութեան չառնուի», ըսաւ ան:
Ըստ Փաշինեանի` փտածութիւնը առաջին հերթին կը կապուի պետական կառավարման մարմիններուն, տեղական կառավարման մարմիններուն, դատական համակարգին հետ: «Այստեղ իմ դիրքորոշումը եղել է եւ շարունակում է մնալ շատ յստակ, որ հանրային կառավարման ոլորտում եւ դատական համակարգում պէտք է աշխատավարձերի էական բարձրացում տեղի ունենա: Չի լինում, որ մենք մի կողմից ասենք` եկէք պայքարենք փտածութեան դէմ, ասենք, որ պետական մարմինները թող որակեալ ծառայութիւններ մատուցեն, եւ ասենք, որ նախարարութիւններում պէտք է լինի 90 կամ 110 հազար դրամով աշխատող մասնագէտ: 2018 թուականի հակափտածութեան ռազմավարութիւնն իրականացրել ենք, մենք հիմա նոր ռազմավարութեան մշակման փուլում ենք գտնւում», ըսաւ ան:
