Արցախի Հանրապետութեան մայրաքաղաք Ստեփանակերտի Վերածնունդի հրապարակին վրայ Դեկտեմբեր 25-ին տեղի ունեցած համաժողովրդական հանրահաւաքը յայտնուած է միջազգային շարք մը առաջատար լրատուամիջոցներու ուշադրութեան կեդրոնին:
Հանրահաւաքին մասին գրած է «Agence France Presse» (AFP) գործակալութեան թղթակիցը: Յօդուածը տարածած են «France 24», «Digital Journal», «Channel News Asia», «RFI» լրատուամիջոցները:
Յօդուածին հեղինակը հակիրճ կը ներկայացնէ Հայաստանի եւ Ատրպէյճանի միջեւ տիրող իրավիճակը, ինչպէս նաեւ Արցախի ժողովուրդին` 2 շաբաթ շարունակուող արգելափակումը:
Յօդուածին հեղինակը, վկայակոչելով ՀՀ կառավարութեան, կը նշէ, որ Լաչինի միջանցքի արգելափակումէն յետոյ Լեռնային Ղարաբաղի մէջ յառաջացած է սնունդի, դեղորայքի եւ վառելանիւթի պակաս:
«AFP»-ի թղթակիցը զրուցած է Ստեփանակերտի 70-ամեայ բնակչուհի Տոնարա Գաբրիէլեանի հետ, որ շեշտած է, որ Լաչինի միջանցքով Արցախը կը կապուի ոչ միայն Հայաստանի հետ:
«Սա միակ ճանապարհն է, որ կապում է Արցախը մնացած աշխարհի հետ, ոչ միայն Հայաստանի, քանի որ մենք աշխարհի հետ կապւում ենք Հայաստանի միջոցով», ըսած է Տոնարա Գաբրիէլեանը:
Ստեփանակերտի մէջ Կիրակի օր տեղի ունեցած հանրահաւաքին անդրադարձած է նաեւ «ТАСС» լրատուական գործակալութիւնը: Լրատուամիջոցը նոյնպէս ներկայացուցած է վերջին երկու շաբաթներուն Լաչինի միջանցքի արգելափակումը եւ երկու կողմերուն յայտարարութիւնները այդ առնչութեամբ: