15-րդ օրն է` Արցախը շրջափակման մէջ է: Վերջին օրերուն սպասում կար, որ Երկուշաբթի` Դեկտեմբեր 26-ին, Լաչինի միջանցքը փակած ատրպէյճանցիները պիտի հեռանան այդտեղէն, ճամբան պիտի բացուի: Այդ մասին ռուս խաղաղապահներու անցակէտ հասած արցախցիները լսած էին:
Առայժմ, սակայն արցախցիները, պաշարման մէջ են: Կարմիր Խաչի Միջազգային Կոմիտէի Լեռնային Ղարաբաղի կառոյցը «Ազատութեան» տեղեկացուց, թէ որեւէ նոր պայմանաւորուածութիւն չկայ ծանր հիւանդներու տեղափոխման կամ մարդասիրական բեռ արցախցիներուն հասցնելու վերաբերեալ: Երէկ Կարմիր Խաչի բեռնատարով ու միջնորդութեամբ 10 թոն դեղորայք ու սնունդ Հայաստանէն Արցախ հասած էր: Շրջափակման կէս ամսուան մէջ ամէն օր կը խորանայ սնունդի, դեղորայքի, վառելանիւթի ճգնաժամը:
Կիրակի օր հազարաւոր արցախցիներ Վերածնունդի հրապարակ հասած էին` «Հայաստան, մի երթար զիջումներու», «Խաղաղութիւն կ’ուզենք», «Բացէք ճանապարհը» բազմալեզու պաստառներով:
«Երեք ճանապարհ ունենք»,- հաւաքուածներուն դիմած է Արցախի պետական նախարարը,- «կամ դանդաղ համարկւում ենք Ատրպէյճանին, կամ դուրս ենք գալիս Արցախից, կամ մնում ենք ու պայքարում»: Վարդանեանը իր ընտրութիւնը կատարած է. «Ես այստեղ եմ, ես պայքարում եմ, ու ես այստեղից չեմ գնալու ու չեմ ենթարկուելու Ատրպէյճանի պայմաններին»:
Պետական նախարարը խոստացած է, որ Արցախի անկախութեան ու յաջողութեան պիտի ուղղէ իր գիտելիքները, կապերը, ունեցուածքը:
