Պրիւքսէլը պիտի չերկարաձգէ Հայաստանի մէջ Եւրոմիութեան դիտորդական առաքելութեան մանտաթի ժամկէտը, որ կ’աւարտի յաջորդ շաբաթ, այս մասին յայտարարած է Եւրոմիութեան դիւանագիտութեան ղեկավար Ժոզեփ Պորէլը` նշելով, որ նման որոշում կայացուած է Եւրոմիութեան անդամ երկիրներու արտաքին գործերու նախարարներու Պրիւքսէլի մէջ տեղի ունեցած նիստին:
Պորէլի գնահատմամբ` առաքելութեան աշխատանքը «արդիւնաւէտ» էր, բայց առաքելութեան ժամկէտը չերկարաձգելու պատճառներու մասին չխօսեցաւ, միայն նշեց, որ «ե՛ւ Հայաստանի, ե՛ւ Ատրպէյճանի հետ պայմանաւորուածութեան համաձայն» առաքելութիւնը իր գործունէութիւնը Դեկտեմբեր 19-ին պէտք է աւարտէ:
«Այդուհանդերձ, Հայաստանի եւ Ատրպէյճանի միջեւ երկխօսութեան միջնորդի մեր հեղինակութիւնը պահպանելու համար Հայաստան պիտի ուղարկուի խումբ մը, որպէսզի ծրագրէ հնարաւոր քաղաքացիական առաքելութեան ուղարկումը, եթէ յաջորդ տարի նման համաձայնութիւն ձեռք բերուի», յայտնած է Պորէլ:
