Ատրպէյճանի գործողութիւնները կրնան յանգեցնել լայնածաւալ մարդասիրական աղէտի, կը յայտարարէ Հայաստանի Արտաքին Գործերու Նախարարութիւնը` միջազգային հանրութեան` ՄԱԿ Անվտանգութեան Խորհուրդի, ԵԱՀԿ Մինսքի Խումբի համանախագահող եւ անդամ երկիրներուն ուշադրութիւնը հրաւիրելով Լաչինի միջանցքին ստեղծուած իրավիճակին:
Ընդգծելով Լեռնային Ղարաբաղի հայութեան իրաւունքներու եւ անվտանգութեան ապահովման միջազգային մեխանիզմներու գործարկման կամ վերագործարկման անհրաժեշտութիւնը` Հայաստանի արտաքին քաղաքական գերատեսչութիւնը կը շեշտէ, որ այս նպատակով յառաջիկային խորհրդակցութիւններ պիտի սկսին միջազգային գործընկերներու հետ:
Լաչինի միջանցքը փակելու նախապատրաստութիւնները մեկնարկած էին դեռ ամիսներ առաջ, կը յայտարարէ Հայաստանի Արտաքին Գործերու Նախարարութիւնը` շարունակելով. «Ակնյայտ է, որ տուեալ սադրանքը կազմակերպուել է Ատրպէյճանի պետական մարմինների կողմից, նպատակ հետապնդելով Լեռնային Ղարաբաղը կտրել Հայաստանի Հանրապետութեան եւ այսպիսով` արտաքին աշխարհի հետ կապից»:
«Այս գործողութեան հետեւանքով ԼՂ բնակիչները զրկուել են ազատ տեղաշարժի իրաւունքից, Լեռնային Ղարաբաղը կանգնած է պարէնային եւ մարդասիրական ճգնաժամի վերահաս վտանգի առաջ», կը նշէ Հայաստանի արտաքին քաղաքական գերատեսչութիւնը` ընդգծելով, որ ստեղծուած իրավիճակը ուղիղ հակադրութեան մէջ է 2020 թուականի Նոյեմբեր 9-ի եռակողմ յայտարարութեան 6-րդ կէտին հետ, համաձայն որուն` ա) Լաչինի միջանցքը կը գտնուի Լեռնային Ղարաբաղի մէջ ռուս խաղաղապահ զօրախումբի վերահսկողութեան ներքոյ, բ) Ատրպէյճանի Հանրապետութիւնը կ’երաշխաւորէ Լաչինի միջանցքով քաղաքացիներու, փոխադրութեան միջոցներու եւ բեռներու երթեւեկութեան անվտանգութիւնը:
«Միջազգային պարտաւորութիւնների, այդ թւում նաեւ 2020 թուական Նոյեմբեր 9-ի եռակողմ յայտարարութիւնով ստանձնած յանձնառութիւնների անշեղօրէն կատարումը, ուժի կիրառումից կամ ուժի կիրառման սպառնալիքից հրաժարումը, հրադադարի խստօրէն պահպանումը, Լաչինի միջանցքում` ռուս խաղաղապահների հսկողութեան ներքոյ տեղաշարժի անխափան իրականացումը առանցքային են ԼՂ հիմնախնդրի քաղաքական հանգուցալուծման, տարածաշրջանում երկարատեւ խաղաղութեան ու կայունութեան հաստատման, ժողովուրդների խաղաղ համակեցութեան համար», ըսուած է յայտարարութեան մէջ:
