Իրանի եւ Հայաստանի միջեւ ապրանքաշրջանառութիւնը վերջին ամիսներուն աճած է 43 տոկոսով, մեր նպատակն է զայն հասցնել 3 միլիառ տոլարի: Այս մասին ըսած է Իրանի նախագահ Իպրահիմ Ռայիսին ՀՀ վարչապետ Նիկոլ Փաշինեանի հետ հանդիպման ժամանակ:
Իրանի նախագահը ըսած է, որ անշուշտ, Հայաստանի վարչապետին այցը Իրանի Իսլամական Հանրապետութիւն շրջադարձային պիտի ըլլայ երկու երկիրներու զարգացման համար:
Իպրահիմ Ռայիսին յայտնած է, որ բարիդրացիութեան քաղաքականութիւնը Իրանի կառավարութեան կողմէ ընդգծուած ռազմավարութիւններէն մէկն է` ընդգծելով, որ վարչապետ Նիկոլ Փաշինեանի օրակարգին մէջ երկկողմ հանդիպումներն են` Իրանի եւ Հայաստանի միջեւ տնտեսական, առեւտրային յարաբերութիւններու եւ անվտանգութեան ոլորտին մէջ յարաբերութիւններու զարգացման համար:
«Մեր նպատակն է ապրանքաշրջանառութիւնը հասցնել երեք միլիառ տոլարի, ինչին կարելի է հասնիլ երկու երկիրներու կամքի առկայութեան պարագային», յաւելած է ան:
Ռայիսին ընդգծած է, որ երկու երկիրներու միջեւ լաւ յարաբերութիւնները, անշուշտ, պիտի յանգեցնեն տարածաշրջանին եւ ամբողջ աշխարհի մէջ յարաբերութիւններու բարելաւման:
Ան յայտնած է, որ Իրանը Կովկասեան տարածաշրջանի պատմութեան, քաղաքակրթութեան եւ մշակոյթի մէկ մասն է, ուստի Կովկասեան տարածաշրջանին մէջ անվտանգութիւնը եւ խաղաղութիւնը եւ իրադարձութիւններու զարգացումները շատ կարեւոր են Իրանի համար:
Իրանի նախագահը շեշտած է, որ տարածաշրջանային խնդիրները պէտք է լուծուին տարածաշրջանային միաւորներուն կողմէ:
«Տարածաշրջանին մէջ օտարերկրացիներու որեւէ միջամտութիւն պիտի ստեղծէ խնդիրներ` հարցերը լուծելու փոխարէն», նշած է ան: