Իրանի մայրուղիներու նախարար Ռոսթամ Ղասէմին յայտնած է, որ իրանեան ընկերութիւնները պատրաստ են զարգացնելու Իրանի եւ Հայաստանի միջեւ փոխադրումները եւ նոր տարանցիկ միջանցք ստեղծելու Հայաստանի եւ Պարսից Ծոցի միջեւ` Արեւելեան Ատրպէյճանի Նորտուզ գիւղով: Ռոսթամ Ղասէմին այս յայտարարութիւնը ըրած է ՀՀ տարածքային կառավարման եւ ենթակառուցուածքներու նախարար Գնէլ Սանոսեանի հետ հանդիպման ժամանակ: Հանդիպման ընթացքին որոշում կայացուած է, որ իրանեան ընկերութիւնները պէտք է համագործակցին Հայաստանի հետ փապուղիներու, ճանապարհներու եւ շէնքերու կառուցման գործին մէջ:
Ելլելով երկու երկիրներու միջեւ կնքուած համաձայնագրէն` նախարարները որոշած են աւարտել եւ զարգացնել Հիւսիս-Հարաւ միջանցքը Նորտուզի սահմանէն մինչեւ Վարզեqան եւ Թաւրիզ: Ղասէմիի խօսքով, քանի որ Իրանը լաւ փորձ ունի «ազգային բնակարանային շարժում» անուանումով բնակարանաշինութեան ոլորտին մէջ, իրանեան շինարարական ընկերութիւնները պիտի սկսին իրենց գործունէութիւնը Հայաստանի մէջ: «Իրանի հիւսիսը աւելի քան 200 միլիոն թոն բեռ կը փոխադրուի, ինչ որ կարելի է լաւ հնարաւորութիւն համարել երկու երկիրներու միջեւ փոխանակումներու զարգացման համար», նշած է իրանցի նախարարը:
Ընդգծելով այն փաստը, որ Իրանը աշխարհի մէջ շաղախի չորրորդ մեծագոյն արտադրողն է, ինչպէս նաեւ արդիւնաւէտ եղած է պողպատի արտադրութեան ոլորտին մէջ, Ղասէմին ըսած է, որ իրանեան շաղախի, պողպատի եւ շինանիւթերու արտադրողները պիտի ներկայացուին Հայաստանի մէջ:
