Հնդկական India Narrative կայքը ծաւալուն յօդուածով անդրադարձած է Հայաստանի պաշտպանութեան նախարար Սուրէն Պապիկեանի` Հնդկաստան կատարած այցին: Կայքը կը գրէ, որ կ’ակնկալուի, որ Հայաստանի եւ Հնդկաստանի միջեւ պաշտպանութեան ոլորտին մէջ փոխգործակցութիւնը վերելք կ’ապրի այն բանէն յետոյ, երբ Հայաստանէն բարձր մակարդակի պատուիրակութիւնը այցելած է Հնդկաստան եւ մասնակցած՝ Կանտինակար քաղաքին մէջ բացուած «DEFEXPO» ցուցահանդէսին:
Կը նշուի, որ Հայաստանի պաշտպանութեան նախարար Սուրէն Պապիկեանը Հնդկաստանի պաշտպանութեան նախարար Շրի Ռաճնաթ Սինկհի հետ հանդիպման ուշադրութիւնը կեդրոնացուցած է ռազմական եւ ռազմատեխնիկական երկկողմ համագործակցութիւնը ընդլայնելու հնարաւորութիւններուն վրայ: «Պապիկեանն ու անոր ուղեկցողները քիչ ժամանակ չեն յատկացուցած Ասիոյ ամենամեծ պաշտպանական միջոցառման ցուցադրուող նմուշները ուսումնասիրելուն», կը գրէ կայքը` յաւելելով, որ կարեւոր այցը տեղի ունեցած է Հայաստանի եւ Ատրպէյճանի միջեւ վերջին ռազմական մագլցումի լոյսին տակ:
Կայքը կը գրէ, որ Հնդկաստանը հետեւողական դիրքորոշում ունի Կովկասի տարածաշրջանին մէջ իրավիճակին վերաբերեալ` մարտական գործողութիւններու սկիզբէն հակամարտութիւնը խաղաղ եւ դիւանագիտական ճանապարհով կարգաւորելու կոչ հնչեցնելով:
India Narrative-ը մէջբերած է ՀՀ պաշտպանութեան նախարար Սուրէն Պապիկեանի խօսքերը իր հնդիկ պաշտօնակիցին հետ հանդիպումէն յետոյ. «Ես ներկայացրեցի Ատրպէյճանի վերջին յարձակման հետեւանքով ստեղծուած իրավիճակը եւ շնորհակալութիւն յայտնեցին Հնդկաստանին միջազգային հարթակներում արտայայտած յստակ դիրքորոշման համար: Ես նաեւ իմ գործընկերոջը հրաւիրեցի պաշտօնական այց կատարել Հայաստան»:
Այնուհետեւ կայքը կը յաւելէ. «Քանի որ Թուրքիան եւ Փաքիստանը ամբողջութեամբ կ’աջակցին Ատրպէյճանին, Երեւանը կը ձգտի ամուր ռազմավարական համագործակցութիւն հաստատելու Նիւ Տելհիի հետ: Ամէն ինչ սկսած է անկէ, որ 2020 թուականին Հնդկաստանը Հայաստանին մատակարարած է զինամթերքի յայտնաբերման 4 «Swathi» ռատար` ընդհանուր 40 միլիոն տոլար արժէքով: Այդ պահէն սկսեալ Հայաստանի կառավարութիւնը` Նիկոլ Փաշինեանի գլխաւորութեամբ, մեծ հետաքրքրութիւն կը ցուցաբերէ հնդկական նորագոյն ռազմական տեխնիկայի, մասնաւորապէս, «Pinaka» հեռահար հրթիռային համակարգերու, ATGM հակահրասայլային կառավարուող հրթիռներու եւ «Akash» զենիթահրթիռային համակարգերու նկատմամբ», կը գրէ կայքը` յիշեցնելով, որ վերջերս հաղորդուած է կողմերուն միջեւ 250 միլիոն տոլարի զէնքի մատակարարման պայմանագրի կնքման մասին:
Կայքը նաեւ յաւելած է, որ Հայաստանի եւ Հնդկաստանի միջեւ բազմադարեայ կապերը աւելի ամուր կը դարձնեն համագործակցութիւնը: