Մոսկուան կը տեսնէ Եւրոպական Միութեան հերթական փորձերը` ամէն գնով միջամտելու Հայաստանի եւ Ատրպէյճանի միջեւ յարաբերութիւններու կարգաւորման գործընթացին, դուրս մղելու Ռուսիան: Այս մասին ամէնշաբաթեայ ճեպազրոյցի ժամանակ յայտարարած է Ռուսիոյ Արտաքին Գործերու Նախարարութեան պաշտօնական ներկայացուցիչ Մարիա Զախարովան:
Անոր խօսքով` Եւրոպական Միութիւնը տակաւին պաշտօնապէս որոշում չէ կայացուցած Հայաստանի եւ Ատրպէյճանի սահմանին մարդասիրական առաքելութիւն տեղակայելու վերաբերեալ:
«Պաքուի ու Երեւանի հաշտեցման, տարածաշրջանին մէջ ամուր խաղաղութեան, երկարաժամկէտ կայունութեան հաստատման միակ բանալին Ռուսիոյ, Հայաստանի եւ Ատրպէյճանի ղեկավարներու եռակողմ յայտարարութիւններու ամբողջական կեանքի կոչումն է», նշած է Զախարովան, յաւելած որ Մոսկուան պարբերական շփումներ կը պահպանէ Հայաստանի եւ Ատրպէյճանի իշխանութիւններուն հետ:
Դիւանագէտին խօսքով` այդ առումով պիտի օգտագործուի նաեւ Ասթանայի մէջ ԱՊՀ արտաքին գործերու նախարարներու յառաջիկայ նիստի հնարաւորութիւնը: