Եւրոմիութեան դեսպանները համաձայնած են Հայաստան ուղարկել քաղաքացիական առաքելութիւն, որ պէտք է տեղակայուի Ատրպէյճանի հետ սահմանին երկայնքով` վստահութիւն ամրապնդելու եւ սահմանազատման նպաստելու համար: Այս մասին կը յայտնէ «Ազատութիւն» ռատիօկայանը` յղում ընելով իր դիւանագիտական աղբիւրներուն:
Կը նշուի, որ որոշումը կայացուած է Քաղաքական եւ Անվտանգութեան Յանձնաժողովի փակ նիստին:
Այժմ արդէն կը քննարկուին անոր իրականացման մանրամասնութիւնները` քանի հոգի պիտի ըլլան, որ երկիրներէն, եւ երբ պիտի ժամանեն Հայաստան: Սակայն յստակ է, որ առաքելութիւնը պիտի գայ, «Ազատութեան» ըսած է Պրիւքսէլի դիւանագիտական աղբիւրը:
Հայաստան քաղաքացիական առաքելութիւն ուղարկելու մասին պայմանաւորուածութիւնը ձեռք բերուած էր անցեալ շաբաթ Փրակի մէջ` Հայաստանի, Ատրպէյճանի, Ֆրանսայի ու Եւրոպական Խորհուրդի ղեկավարներուն` ժամեր շարունակուած բանակցութիւններու ղնորհիւ: Պաքուն, որ մինչ այդ մերժած էր Հայաստանի հետ սահմանին զինուած ուժեր տեղակայելու Եւրոմիութեան առաջարկը, անզէն առաքելութեան պարագային չէր ընդդիմացած, միաժամանակ ընդգծած էր, որ պիտի համագործակցի «այնքանով, որքանով որ առնչութիւն կ’ունենայ»: