ՀՀ վարչապետ Նիկոլ Փաշինեանի գլխաւորութեամբ Սեպտեմբեր 19-ին տեղի ունեցած է ՀՀ Անվտանգութեան Խորհուրդի նիստ, որուն ընթացքու յայտարարուած է, որ Հայաստանի Հանրապետութիւնը իրեն հասու բոլոր միջոցներով պիտի պաշտպանելէ իր անկախութիւնը, ինքնիշխանութիւնը, տարածքային ամբողջականութիւնը: Ատրպէյճանական զօրքերը պէտք է դուրս գան ՀՀ բռնագրաւուած տարածքներէն:
ԱԽ յայտարարութիւնը ամբողջութեամբ ստորեւ.
«2022 թուականի Սեպտեմբերի 12-ի լոյս 13-ի գիշերը Ատրպէյճանի զինուած ուժերը լայնածաւալ յարձակում են սկսել Հայաստանի Հանրապետութեան ինքնիշխան տարածքի նկատմամբ` խոշոր տրամաչափի զինատեսակների, հրետանու, հրթիռային համակարգերի, անօդաչու թռչող սարքերի կիրառմամբ:
Յարձակման հետեւանքով զոհուածների եւ անհետ կորածների թիւը հասնում է 207-ի, այդ թւում` զոհուել է քաղաքացիական 3 անձ, 2 քաղաքացիական անձի գտնուելու վայրը համարւում է անյայտ, վիրաւորուել է 293 զինծառայող, 7 քաղաքացիական անձ, գերեվարուել է 20 զինծառայող: Առկայ են ապացոյցներ հայաստանցի գերեվարուած կամ զոհուած զինծառայողներին ատրպէյճանցիների կողմից խոշտանգումների ենթարկելու, անդամահատելու, այդպիսով ապօրինի կերպով կեանքից զրկելու դէպքերի վերաբերեալ:
Ատրպէյճանի զինուած ուժերի կողմից թիրախաւորուել են 36 բնակավայրեր, այդ թւում` Գորիս, Սիսիան, Կապան, Ջերմուկ, Վարդենիս, Տեղ, Գեղամասար համայնքները, ինչի հետեւանքով մասնակի կամ ամբողջական աւերուել են 192 տուն, 3 հիւրանոց, 2 դպրոց, 1 բժշկական հաստատութիւն, 1 հանդիսութիւնների սրահ, 4 անասնագոմ: Վնասուել է 7 ելեկտրական ենթակառուցուածք, 5 ջրային ենթակառուցուածք, 3 կազամուղ, 1 կամուրջ, 2 մայրուղի, 1 փողոց: Թիրախաւորուել են 2 շտապօգնութեան մեքենայ, 4 անձնական օգտագործման ինքնաշարժ:
Ատրպէյճանի զինուած ուժերը մի քանի ուղղութիւններով մխրճուել են Հայաստանի Հանրապետութեան ինքնիշխան տարածք: Հայաստանի Զինուած ուժերի յամառ եւ հերոսական դիմադրութեան եւ միջազգային հանրութեան ներգրաւման շնորհիւ Ատրպէյճանի յարձակումը կասեցուել է, սակայն ռազմաքաղաքական իրադրութիւնը շարունակում է մնալ լարուած:
Ատրպէյճանի կողմից վարուող նախայարձակ քաղաքականութիւնը տարածաշրջանում խաղաղութիւն հաստատելու, տարածաշրջանային հաղորդակցութիւնների բացման, ԼՂ հիմնախնդրի համապարփակ կարգաւորմանն ուղղուած ջանքերը վիժեցնելու եւ Հայաստանի Հանրապետութեանն ուժային լուծումներ պարտադրելու նպատակ ունեն:
Հայաստանի Հանրապետութիւնը որդեգրած լինելով խաղաղութիւն հաստատելու, տարածաշրջանային հաղորդակցութիւնների բացման օրակարգ` անընդունելի է համարում Ատրպէյճանի կողմից վարուող սպառնալիքի եւ հարկադրանքի քաղաքականութիւնը:
Անվտանգութեան Խորհուրդը յայտարարում է, որ Հայաստանի Հանրապետութիւնն իրեն հասու բոլոր միջոցներով պաշտպանելու է իր անկախութիւնը, ինքնիշխանութիւնը, տարածքային ամբողջականութիւնը: Ատրպէյճանական զօրքերը պէտք է դուրս գան ՀՀ բռնագրաւուած տարածքներից:
Միջազգային հանրութեանը կոչ ենք անում Ատրպէյճանի վրայ շարունակաբար ճնշումներ գործադրել` ՀՀ ինքնիշխան տարածքների բռնագրաւման վերջ դնելու եւ զօրքերը ետ քաշելու ուղղութեամբ եւ ողջունում ենք բոլոր այն երկրներին եւ կազմակերպութիւններին, որոնք հանդէս են եկել յստակ դիրքորոշմամբ:
Միեւնոյն ժամանակ, վերահաստատում ենք միջազգային հանրութեան պատասխանատու անդամի պարտաւորութեանը հաւատարիմ մնալու Հայաստանի Հանրապետութեան յանձնառութիւնը»:
