Հայաստանի վարչապետ Նիկոլ Փաշինեանի, Եւրոպական Խորհուրդի նախագահ Շարլ Միշէլի եւ Ատրպէյճանի նախագահ Իլհամ Ալիեւի Պրիւքսէլի մէջ փակ դռներու ետին հանդիպումը տեւած է մօտ չորս ժամ:
Հայաստանի վարչապետի մամուլի ծառայութեան փոխանցմամբ` եռակողմ հանդիպման ընթացքին քննարկուած են գերիներու ազատ արձակման եւ անհետ կորսուածներու ճակատագրի պարզաբանման, սահմանազատման եւ սահմանային անվտանգութեան, տարածաշրջանային ապաշրջափակման, Հայաստան-Ատրպէյճան յարաբերութիւններու կարգաւորման, Լեռնային Ղարաբաղի հիմնախնդիրին վերաբերող հարցեր:
Աղբիւրը կը տեղեկացնէ նաեւ, որ պայմանաւորուածութիւն ձեռք բերուած է արտաքին գործերու նախարարներու մակարդակով շարունակել «առարկայական բանակցութիւնները խաղաղութեան պայմանագրի նախագիծի մշակման շուրջ», եւ որ նախարարներ Արարատ Միրզոյեանն ու Ճէյհուն Պայրամովը պիտի հանդիպին մէկ ամսուայ ընթացքին:
Ինչ կը վերաբերի սահմանազատման եւ սահմանային անվտանգութեան հարցերու յանձնաժողովի յաջորդ նիստին, վարչապետ Փաշինեանի գրասենեակը կը յայտնէ, որ այն տեղի պիտի ունենայ Նոյեմբերին, Պրիւքսէլի մէջ:
Նոյն ամսուան մէջ, աղբիւրին համաձայն, պիտի հանդիպին նաեւ Նիկոլ Փաշինեանն ու Իլհամ Ալիեւը: