Հայաստանը հանդէս կու գայ տարածաշրջանին մէջ խաղաղութեան դարաշրջան բանալու օրակարգով եւ ջանքեր կը գործադրէ թէ՛ տարածաշրջանային ենթակառուցուածքներու եւ փոխադրութեան ուղիներու ապաշրջափակման, թէ՛ սահմանազատման եւ սահմանային անվտանգութեան ուղղութեամբ: Այս մասին յայտարարած է Ազգային Ժողովի նախագահ Ալէն Սիմոնեանը՝ Գերմանիոյ Պունտեսթակի փոխնախագահ Քաթրին Կէօրինկ-էքքարտթի գլխաւորած պատուիրակութեան հետ հանդիպման ժամանակ:
Ազգային Ժողովի աշխատակազմի լրատուական վարչութեան փոխանցմամբ` Սիմոնեան շեշտած է, որ Հայաստանը տարածքային պահանջներ չունի իր հարեւաններուն հանդէպ:
Կէօրինկ-էքքարտթը նշած է, որ աչալրջօրէն կը հետեւին տարածաշրջանին մէջ տեղի ունեցող իրադարձութիւններուն, եւ համոզմունք յայտնած է, որ հակամարտութիւններու լուծման արդիւնաւէտ ուղին խաղաղ բանակցութիւններն են:
Վարչապետ Նիկոլ Փաշինեան եւս ընդունած է Պունտեսթակի փոխնախագահը, անդրադարձ կատարուած է Հարաւային Կովկասի տարածաշրջանին մէջ իրավիճակին եւ անվտանգային մարտահրաւէրներուն:
Պունտեսթակի փոխնախագահը նշած է, որ Գերմանիան կը կարեւորէ տարածաշրջանային խաղաղութիւնը եւ կ’աջակցի այդ ուղղութեամբ Հայաստանի քայլերուն: