ԱՄՆ Պետական Քարտուղարութեան ներկայացուցիչ Նետ Փրայս պատասխանած է Երեւանի եւ Պաքուի յարաբերութիւններու կարգաւորման հարցով ԱՄՆ դերին մասին հարցումին: «Մենք մշտապէս յայտարարած ենք, որ պատրաստ ենք փոխգործակցելու երկկողմ հիման վրայ եւ գործընկերներու հետ, այդ շարքին` ԵԱՀԿ Մինսքի Խումբի համանախագահի մեր դերով, որպէսզի օգնենք երկիրներուն հասնիլ երկարաժամկէտ եւ համապարփակ խաղաղութեան»:
Ան ըսած է, որ ԱՄՆ-ն աշխոյժ դեր կը խաղայ կարգաւորման հարցով: «Պետական քարտուղարի օգնական Քարըն Տոնֆրիտ եւ այլ անձեր հնարաւորութիւն ունեցած են բարձր մակարդակով կապ հաստատելու իրենց հայ եւ ատրպէյճանցի գործընկերներուն հետ: Մենք ողջունած ենք Հայաստանի եւ Ատրպէյճանի Արտաքին Գործերու Նախարարութեան ղեկավարներուն հանդիպումը: Մենք կը կարծենք, որ երկխօսութիւնը խաղաղ, դեմոկրատական եւ բարգաւաճ ապագայի հասնելու լաւագոյն միջոցն է Հարաւային Կովկասի տարածաշրջանին համար, եւ մենք պիտի շարունակենք աջակցիլ անոր հնարաւոր բոլոր ձեւերով», ըսած է ան: