Ափրիկէէն տուն վերադառնալու ճանապարհին, Թուրքիոյ նախագահ Ռեճեպ Թայիպ Էրտողան օդանաւին մէջ լրագրողներու հետ զրոյցին ընթացքին խօսած է հայ-թրքական յարաբերութիւններուն մասին:
«Անգարան կրնայ բանալ սահմանները եւ վերականգնել դիւանագիտական կապերը, եթէ Երեւանը հաւատարիմ ըլլայ երկու երկիրներու յարաբերութիւններու բարելաւման գործընթացին», ըսած է Թուրքիոյ ղեկավարը:
Անոր խօսքով` Անգարայի մէջ գիտեն, որ Հայաստանը «որոշ յստակ ակնկալիքներ ունի, մասնաւորապէս` սահմանները բանալու եւ դիւանագիտական կապեր հաստատելու վերաբերեալ»:
«Եթէ Հայաստանը հաւատարիմ մնայ երկու բանագնացներու (Սերտար Քըլըճ եւ Ռուբէն Ռուբինեան) նախաձեռնած գործընթացը շարունակելու գաղափարին, մեզի համար այլեւս չ’ըլլար այնպիսի բան, ինչպիսին փակ դռներն են», ըսած է Էրտողան:
Հայաստանի Ազգային Ժողովի փոխխօսնակ Ռուբէն Ռուբինեանի եւ ԱՄՆ-ի մէջ Թուրքիոյ նախկին դեսպան Սերտար Քըլըճի առաջին հանդիպումը տեղի ունեցած է Յունուար 14-ին, Մոսկուայի մէջ: Երկու բանագնացները Փետրուար 24-ին, Վիեննայի մէջ, երկրորդ հանդիպումը պիտի ունենան:
