ՀՀ քննչական կոմիտէի նախկին նախագահ, ՀՀ նախկին Գլխաւոր դատախազ՝ Աղուան Յովսէփեանի կալանքը երրորդ անգամ 2 ամիսով երկարեցաւ։ Այս մասին լուրը Իրաւաբան․net-ի հետ զրոյցի ընթացքին հաստատեց փաստաբան Էրիկ Ալեքսանեան։ Ան նշեց, որ որոշումը կայացած է Յունուար 4-ին։
Յիշեցնենք, որ ըստ Յատուկ քննչական ծառայութեան տարածած հաղորդագրութեան` քրէական գործով ձեռք բերուած բաւարար ապացոյցներու համակցութեամբ հիմնաւորուած է, որ Աղուան Յովսէփեան, 2004 թուականի Մարտ 18-էն մինչեւ 2013 թուականի Սեպտեմբեր 13-ը գրաւելով գլխաւոր դատախազի, իսկ 2014 թուականի Յուլիս 18-էն մինչեւ 2018 թուականի Յունիս 11-ը՝ քննչական կոմիտէի նախագահի պաշտօնները, յիշեալ ժամանակամիջոցին փաստացի մասնակցած է ձեռնարկատիրական գործունէութիւն կատարող շարք մը ՍՊ ընկերութիւններու կառավարման, բացի այդ ստացած է առանձնապէս խոշոր չափերով` 190 միլիոն ՀՀ դրամ կաշառք եւ խարդախութեան եղանակով կատարած առանձնապէս խոշոր չափերով` 800 միլիոն ՀՀ դրամ գոյքի յափշտակութիւն:
Յովսէփեանին մեղադրանք առաջադրուած է նաեւ յանցաւոր ճանապարհով ստացուած առանձնապէս խոշոր չափերով` ընդհանուր 1.299.404.414 ՀՀ դրամ գոյքը (դրամալուացում) օրինականացնելու յօդուածով: Աղուան Յովսէփեան կալանաւորուած էր 2021 թուականի Սեպտեմբեր 8-ին:
