Մահացած է Ողիմպիական խաղերու ախոյեան, աշխարհի ցուցանիշակիր, ծանրորդ Եուրի Վարդանեանը: Այդ մասին կը տեղեկացնէ «Արմէնբրես»-ը, վկայակոչելով Սփորթի եւ երիտասարդութեան հարցերու նախարարութիւնը:
Մահուան պատճառները դեռ յայտնի չեն: Վարդանեանը կ’ապրէր ԱՄՆ-ի մէջ:
Եուրի Վարդանեանը ծնած է 13 Յունիս 1956-ին: 1977-ին ստացած է ԽՍՀՄ սփորթի վաստակաւոր վարպետի կոչում:
1977-1979, 1980-1981, 1983, 1985 թուականներուն ան դարձած է աշխարհի ախոյեան եւ գաւաթակիր: 1980 թուականին` ողիմպիական ախոյեան: 1977-1978, 1980-1981, 1983 թուականներուն` Եւրոպայի ախոյեան եւ գաւաթակիր: 1977, 1979, 1981 թուականներուն` ԽՍՀՄ ախոյեան եւ 1976 թուականին գաւաթակիր: 1978-1981 թուականներուն ճանչցուած է աշխարհի լաւագոյն ծանրորդ: 1985 թուականին սահմանած է աշխարհի 43 ցուցանիշ:
1980 թուականին միջին քաշի մէջ առաջինը երկամարտի ցուցանիշը հասցուցած է 400 քկ-ի:
2009 թուականին նշանակուած է Հայաստանի նախագահի խորհրդական: 8 Մայիս 2013-ին ազատուած է նախագահի խորհրդականի պաշտօնէն եւ նշանակուած Սփորթի եւ երիտասարդութեան հարցերու նախարար: 24 Յունիս 2014-էն մինչեւ 2017 թուականը զբաղեցուցած է Վրաստանի մէջ Հայաստանի դեսպանի պաշտօնը:
