Պետութեան եւ ժողովուրդի առաջ յանցագործութիւն կատարած բոլոր անձինք պիտի ենթարկուին պատասխանատուութեան, ֆէյսուքեան ուղիղ հեռարձակման ընթացքին յայտարարած է վարչապետ Նիկոլ Փաշինեան:
Վարչապետն ընդգծած է՝ Հայաստանի Հանրապետութեան մէջ օրինականութեան հաստատումն այլընտրանք չունի: «Այս ճանապարհը՝ օրինականութեան հաստատման ճանապարհն այլընտրանք չունի եւ բոլորը պատասխան են տալու իրենց արարքների համար» Հայաստանի Հանրապետութեան օրէնսդրութեամբ սահմանուած կարգով եղանակներով եւ ձեւերով», – ըսած է վարչապետը՝ շարունակելով. – «Ուզում եմ նաեւ ասել, որ այս ողջ փրոցեսի (գործընթացի) ընթացքում մեր կառավարութիւնը, մեր իշխանութիւնը նոյնպիսի պատասխանատուութիւն է զգում ձեր առաջ՝ Հայաստանի պետականութեան առաջ, ժողովրդի առաջ, օրինականութեան առաջ եւ մենք նաեւ այս ողջ քաղաքական գործընթացը կազմակերպելու ենք ժողովրդից ստացած լիազօրութիւնների սահմաններում եւ այդ լիազօրութիւնների սահմանները չենք անցնելու ոչ մի պարագայում, որովհետեւ մենք չենք ուզում ուրիշների ապօրինութիւնները փոխարինել մեր ապօրինութիւններով, չենք ուզում ուրիշների թալանը փոխարինել մեր թալանով, մենք չենք ուզում ուրիշների գողացածը տեղափոխել մեր գրպաններ, ուզում ենք ուրիշների գողացածը տեղափոխել պետական պիւտճէ եւ ծառայեցնել մեր ժողովրդի եւ պետութեան կարիքներին: Բոլոր յանցագործները ենթարկուելու են պատասխանատուութեան: Ժողովրդից գողացուած ամէն մի կոպեկ, ամէն մի լումայ վերադարձուելու է ժողովրդին»:
Նշելով, որ Հայաստանի Հանրապետութեան մէջ հաստատուած է ժողովուրդի իշխանութիւն, Փաշինեանն ըսած է «Հայաստանի մէջ գոյութիւն չունի որեւէ ուժ որ ի վիճակի ըլլայ կանգնիլ ժողովուրդի իշխանութեան առաջ»:
«Հաւատացած եղէք, որ Հայաստանի Հանրապետութիւնում գոյութիւն չունի որեւէ ուժ, որ ի վիճակի լինի կանգնել ժողովրդի իշխանութեան առաջ, որ ի վիճակի լինի կանգնեցնել ժողովրդական յեղափոխութեան յաղթանակը, ով որ կը փորձի կանգնել այդ ճանապարհին կը յայտնուի պատմութեան աղբանոցում», – յայտարարած է վարչապետը:
