Չէ եղած մէկ ոլորտ, ուր ստուգումներու արդիւնքով ցնցող բացայայտումներ չըլլան, երէկ կառավարութեան նիստի ժամանակ յայտարարած է վարչապետ Նիկոլ Փաշինեանը՝ ընդգծելով, թէ պետական միջոցները կը վատնուին բոլոր ուղղութիւններով:
«Ցաւօք սրտի, առայժմ չունենք էնպիսի իրավիճակ, որ ասենք՝ այ, էստեղ ինչ-որ բան կասկածելի է թուում, գնանք տեսնենք ինչ է կատարուում, գնանք, յետ գանք, ասենք՝ չէ, ոչ մի բան էլ չի կատարուում, ամէն ինչ նորմալ է: Բառացիօրէն, ես, յամենայն դէպս, չեմ յիշում էդպիսի դէպք, որ որեւէ տեղ մտնեն ստուգող մարմինները, եւ մի հատ ցնցող՝ եթէ ոչ ծաւալի, առնուազն՝ գործելակերպի եւ ցինիզմի առումով, մի հատ ցնցող բացայայտում չանեն», – ըսած է Փաշինեանը՝ շարունակելով․ – «Այսինքն՝ կարող ենք արձանագրել, որ մեր բոլոր ուղղութիւններով մեր պետական միջոցները փոշիացուում են»:
Ուժային կառոյցները՝ դատախազութիւնը, ոստիկանութիւնը եւ Ազգային անվտանգութեան ծառայութիւնը կ’ուսումնասիրեն բարձրաստիճան պաշտօնեաներու որդիներու բանակին մէջ չծառայելու դէպքերը: Վարչապետի փոխանցմամբ՝ նախնական արդիւնքները խայտառակ պատկեր արձանագրած են:
Վարչապետը կառավարութեան անդամներուն առջեւ յայտարարած է, թէ պիտի երթան բոլոր պաշտօնեաներուն ետեւէն՝ արմատախիլ ընելու զօրակոչի ընթացքին չարաշահումները: «Զարմանալին էն ա, որ էսքան քաղաքական յայտարարութիւններ են հնչում, էսքան ասում ենք, յայտարարում ենք, բարձրաձայնում ենք, ինչ-որ մարդկանց այսինքն թուում է, թէ մենք կատակ ե՞նք անում, ես չեմ հասկանում: Այսինքն, էդքանից յետոյ գնում են պայմանաւորուում են, կաշառք են տալիս, կաշառք են վերցնում, վերջում ձերբակալուում են, վերջում ասում են՝ վայ, էս ինչ եղաւ: Եղաւ էն, ինչ որ պէտք ա լինի, ինչ որ պէտք ա լինէր, եւ լինելու ա էն, ինչ որ պէտք ա լինի: Այսինքն, էլի եմ ասում, որեւէ մէկը չմտածի, թէ մենք որեւէ կէտում որեւէ պատճառով կը կանգնենք՝ դա չի՛ լինելու», – ըսած է Նիկոլ Փաշինեանը:
«Ես էլի ուզում եմ պաշտօնապէս յայտարարեմ՝ կոռուպցիայի հետ քոմփրոմիս (կաշառակերութեան հետ փոխհամաձայնութիւն) չի լինելու, չի՛ լինելու», – ընդգծած է Հայաստանի վարչապետը: