2018-ի երկրորդ եռամսեակի ընթացքին, Հայաստան Արցախ Ֆոնտը $5 միլիոն արժէքով մարդասիրական օժանդակութիւն հայթայթած է Հայաստանին ու Արցախին։
Սոյն օժանդակութիւնը իրականացնելու համար, Հայաստան Արցախ Ֆոնտը $4.2 միլիոն ընդհանուր արժէքով դեղորայք եւ այլ մարդասիրական պիտոյքներ ապահոված է AmeriCares կազմակերպութենէն ($3.8 միլիոն), Direct Relief-էն ($290,000), եւ Գանատայի Health Partners International-էն ($156,000)։
Մեծարժէք ապրանքներ նուիրած են նաեւ Ամերիկայի Հայ Աւետարանչական Ընկերակցութիւնը / Քէմփ Արեւ ($402,000), Project Agape ($96,000), Հաուըրտ Գարակէօզեանի Յիշատակի Ընկերութիւնը ($86,000), Վիքթոր Փամպուքչեան ($86,000), եւ Սերգեյ Սարգիսով ($15,500)։
Մարդասիրական օժանդակութեան մեծապէս նպաստած են նաեւ Բժ. Ալպերթ Ֆիլիփս ($10,500), Բժ. Հրայր Կարապետեան / Providence Center for Congenital Heart Disease ($2,300), եւ Բժ. Յակոբ Յովակիմեան ($1,500)։
Իսկ Բժ. Կարօ Արզու՝ Կլենտէյլ, Քալիֆորնիայէն, առատաձեռնօրէն հոգացած է $1.8 միլիոն ընդհանուր արժէքով քաղցկեղի դեղորայքի երկու օդային առաքումներու ծախսը։
Այս ժամանակաշրջանին նուիրուած դեղորայքն ու բժշկական պիտոյքները առաքուած են Հայաստանի Առողջապահութեան Նախարարութեան, Արցախի Առողջապահութեան Նախարարութեան, ՀԲԸՄ Քլոտիա Նազարեան Սուրիահայ Գաղթականներու Բժշկական Կեդրոնին, Արաբկիրի Մանուկներու Միացեալ Հիմնարկին, Հայաստանի Ակնաբուժական Ծրագրին, Մուրացան Երեխաներու Ներզատաբանութեան (Endocrinology) Կեդրոնին, Ուռուցքաբանութեան Ազգային Կեդրոնին, Նորք Մարաշ Բժշկական Կեդրոնին, եւ Սբ. Գրիգոր Լուսաւորիչ Բժշկական Կեդրոնին։
Անցեալ 30 տարիներուն, Հայաստան Արցախ Ֆոնտն ու զայն նախորդած Միացեալ Հայկական Ֆոնտը Հայաստանին ու Արցախին հայթայթած են $789 միլիոն ընդհանուր արժէքով մարդասիրական օժանդակութիւն, 158 թռիչքներով եւ 2,408 ծովային արկղերով։ 2018-ի առաջին վեց ամիսներուն, Հայաստան Արցախ Ֆոնտը $11.8 միլիոն ընդհանուր արժէքով դեղորայք առաքած է Հայաստան եւ Արցախ։
«Հայաստան Արցախ Ֆոնտին կանոնաւորաբար կ՚առաջարկուի միլիոնաւոր տոլար արժէքով կեանք փրկող դեղեր եւ բժշկական պիտոյքներ», յայտնեց Հայաստան Արցախ Ֆոնտի Նախագահ Յարութ Սասունեանը եւ շարունակեց՝ «Մեզի կը մնայ հոգալ առաքման ծախսը միայն։ Մեծապէս կը քաջալերենք ձեր առատաձեռն նուիրատուութիւնները, որպէսզի կարենանք շարունակաբար այս կենսական օժանդակութիւնը տրամադրել Հայաստանի եւ Արցախի բոլոր բժշկական կեդրոններուն»։
Յաւելեալ տեղեկութեան համար, կը խնդրուի դիմել Հայաստան Արցախ Ֆոնտի գրասենեակին. հեռաձայնի թիւ՝ (818) 241-8900. իմէյլի հասցէ՝ [email protected]։
