Home ԳԼԽԱՒՈՐ ԼՈՒՐԵՐ Համաշխարհային Դրամատան Կանխատեսումով 2018 Թուականին Հայաստանի Տնտեսական Աճը Պիտի Կազմէ 3․7 Տոկոս

Համաշխարհային Դրամատան Կանխատեսումով 2018 Թուականին Հայաստանի Տնտեսական Աճը Պիտի Կազմէ 3․7 Տոկոս

by MassisPost

Համաշխարհային դրամատան մասնագէտները կը կարծեն, որ յառաջիկայ երեք տարիներու ընթացքին Հայաստանի մէջ տնտեսական աճը չի գերազանցեր 4 տոկոսը: «Համաշխարհային տնտեսութեան հեռանկարները» զեկոյցին մէջ Հայաստանի վերաբերեալ ներկայացուած է հետեւեալ կանխատեսումը՝ 2018 թուականին տնտեսական աճը պիտի կազմէ 3․7 տոկոս, 2019 եւ 20 թուականներուն՝ 4 տոկոս:

Մինչդեռ Ֆինանսներու նախարարութիւնը աւելի վաղ յայտարարած էր, որ դիտարկուող ժամանակահատուածին մէջ Հայաստանի տնտեսութիւնը պիտի աճի 4․7- 5․7 տոկոսով: Ընդգծենք, որ պետական պիւտճէի համաձայն, 2018 թուականին կը ծրագրուի ապահովել 4․5 տոկոս տնտեսական աճ: Մեկնաբանելով Համաշխարհային դրամատան ներկայացուցած ցուցանիշները` Ֆինանսներու նախարարութիւնը տարբերութիւնը կը բացատրէ մեթոտաբանութեամբ:

Հակառակ տնտեսական աճի համեստ կանխատեսումներուն` Համաշխարհային դրամատունը բարելաւած է կարծիքը Հայաստանի տնտեսութեան հեռանկարներուն վերաբերեալ: 2017 թուականի ամրան կառոյցի մասնագէտները այս տարուայ համար կանխատեսած էին 3․6 տոկոս աճ: ֆինանսներու փոխնախարար Արմէն Հայրապետեանը համոզուած է, որ միջազգային հեղինակաւոր կառոյցները կը նկատեն դրական միտումները Հայաստանի տնտեսութեան մէջ․

Միաժամանակ զեկոյցին մէջ ընդգծուած է, որ տարածաշրջանային տնտեսութեան զարգացման մէջ մեծ է Ռուսաստանի եւ Թուրքիոյ դերը: Մեկնաբանելով Համաշխարհային դրամատան զեկոյցը, Տնտեսագէտ Արտակ Մանուկեան ընդգծած է, որ նման կառոյցներու կանխատեսումները, սովորաբար ընդհանրացուած կ’ըլլան: – «Եթէ տարիներով ուսումնասիրէք՝ օրինակ Արժոյթի միջազգային հիմնադրամի կանխատեսումները, Համաշխարհային պանքի կանխատեսումները, յատկապէս այսպիսի փոքր տնտեսութիւնների համար, որոնք բաւականաչափ մեծ ներուժ ունեն եւ համաշխարհային շուկայում տեղի ունեցող որեւէ փոքր փոփոխութիւնը նրանց համար շատ աւելի մեծ ազդեցութիւն կարող է ունենալ, քան հակառակինը, կը տեսնէք, որ շեղումը միշտ առկայ է եղել եւ նման կարգի կառոյցները միջինացուած որոշակի մի սենար են դնում», – ըսած է տնտեսագէտը:

Հակառակ ակնկալուող տնտեսական աճին՝ Արտակ Մանուկեանը ընդգծած է, որ այս տարի, 2017-ի համեմատ քաղաքացիի կենսամակարդակը անկում պիտի ապրի․ – «Այսինքն այն ամէն ինչը, որ թանկանալու է՝ հիմնականում լայն սպառման ապրանքների վրայ է ազդելու: Հասկանալի է, որ այս ոլորտում գրեթէ բոլորը գերիշխող դիրք ունեցող նիւթեր են, եւ ոչ թէ մրցակցութիւնն է սրանով սրուելու, այլ այս ծախսերը բաշխուելու են սպառողների վրայ»:

Ուշագրաւ է, որ թէեւ դեռ չէ հրապարակուած 2017 թուականի տնտեսական աճի ցուցանիշը, սակայն տարեվերջին նախագահ Սերժ Սարգսեանը յայտարարած էր, որ այն կրնայ գերազանցել 6 տոկոսը:

Հարակից Նյութեր

Leave a Comment