Ըստ Ազգային վիճակագրական ծառայութեան, եթէ 2007-ին երկրի աղքատ բնակչութեան տոկոսը 26,5 էր, ապա Սերժ Սարգսեանի պաշտօնավարման տարիներուն այդ թիւը հասած է մօտ 30-ի: Այլ ուշագրաւ ցուցանիշ․ պաշտօնական տուեալներով, վերջին 9 տարիներուն Հայաստանէն մեկնած ու այլեւս չեն վերադարձած մօտ 335 հազար քաղաքացի:
Արդեօ՞ք «աւելի բարեկեցիկ է» Հայաստանը, ինչպէս իշխող Հանրապետական կուսակցութեան 16-րդ համագումարին յայտարարեց նախագահ Սերժ Սարգսեանը՝ ներկայացնելով վերջին 9 տարիներու ընկերային-տնտեսական պատկերը:
Վերջին ութ տարիներուն Սերժ Սարգսեանի բնորոշմամբ՝ «աւելի բարեկեցիկ» կեանքով ապրող հայաստանցիներէն մօտ 50 հազարը դարձած են գործազուրկ։ Եթէ 2007-ին գործազուրկ էր բնակիչներու 18,1 տոկոսը, ապա 2015-ին այդ թիւը աճած է, հասնելով 18,5 տոկոսի։ Ըստ ԱՎԾ-ի, 2008-էն յետոյ Հայաստանի պետական պարտքը աւելցած է աւելի քան 2,5 անգամ՝ 1,9 միլիառ տոլարէն հասնելով 5 միլիառի։ Այսինքն՝ իւրաքանչիւր հայաստանցիին բաժին հասնող պարտքը այժմ կը կազմէ մօտ 1700 տոլար։
Բարեկեցութեան խօսուն բնութագրիչ է նաեւ նուազագոյն սպառողական զամբիւղի արժէքը։ Ըստ Հայաստանի առողջապահութեան նախարարութեան, 2007-ին այն կազմած է 23 160 դրամ, իսկ 2015-ին գոյութիւն պահպանելու համար անհրաժեշտ սննդի, հագուստի, դեղորայքի եւ վիճակային վճարումներու համար մէկ քաղաքացիին ամսական հարկաւոր է 57 հազար դրամ։ Մինչդեռ, Հայաստանի միջին կենսաթոշակը, ինչպէս իր ելոյթին նշած էր Սերժ Սարգսեանը, էականօրէն բարձրացած է՝ հասնելով 42 500 դրամի:
Սակայն, կենսաթոշակներու եւ աշխատավարձերու բարձրացման զուգահեռ, Սարգսեանի պաշտօնավարման տարիներուն էականօրէն բարձրացած են նաեւ կենսուժի համակարգին մէջ գործող սակագները։
