Ազգային Ժողովի ՔՊ պատգամաւոր Վահագն Ալեքսանեան իր ֆէյսպուքեան էջով տեսանիւթ հրապարակած է` կից գրելով․
«Այսօրուայ պէս յիշում եմ, թէ ինչպէս էր պատգամաւոր Արամ Վարդեւանեանը ՍԴ-ում ընտրութեան արդիւնքները բողոքարկելիս պատմում, որ չի կարելի ընտրութեան արդիւնքները ճանաչել, քանի որ ելոյթների ժամանակ ամպիոնից մուրճ է ՑՈՒՑԱԴՐՈՒԵԼ:
Այս օրերին նոյն Վարդեւանեանը հեքիաթներ է պատմում խաղաղ ցոյցերի, խաղաղ, ճնշուած ու բռնութեան ենթարկուած ցուցարարների ու մնացածի մասին:
Սրանք պարզապէս կադրեր չեն ցուցարարի կողմից ոստիկանի գլխին մուրճով հարուածելու մասին, սրանք կադրեր են երեսպաշտութեան, արեան ծարաւի ու տեռորի կարօտի մասին: Այս ցոյցերի կազմակերպիչները, այո՛, տենչում են արիւն, երազում են տեսնել գլուխները ջարդուած ոստիկաններ, Երեւանի փողոցներում` արեան գետեր:
Ու խօսելով ոստիկանութեան կողմից կիրառուող անհամաչափ ուժի մասին` այո՛, այս կադրերում էլ է ակնյայտ, որ ոստիկանութեան կիրառած ուժն անհամաչափ է: Երբ ոստիկանը բաց ձեռքերով գնում է ձերբակալելու իր գլխին մուրճով հարուածող խաժամուժին, այո՛, դա անհամաչափութիւն է եւ այդ անհամաչափութիւնը պիտի վերանայ: Խուժանը պիտի յայտնուի ճաղերի ետեւում եւ շատ երկար ժամանակ անցկացնի այնտեղ:
Եւ փաստ է նաեւ, որ Քոչարեանը, Իշխանն ու մնացածը պատրաստ են «պայքարել» մինչեւ վերջին ցուցարարի հակաօրինական գործողութիւնն ու համաչափ ազատազրկումը: Ուրիշ բան, թէ դրան ինչքանով են պատրաստ մնացած մի քանի հարիւր ցուցարարները:
Եւս մէկ անգամ աջակցութիւնս եմ յայտնում իրենց կեանքն ու առողջութիւնը վտանգելով օրէնքն ու իրաւունքը պաշտպանող ոստիկաններին:
Յ․Գ․ Այս ցոյցի բռնութիւնների գործով արդէն կայ 13 կալանաւորուած»:
