Վարչապետ Նիկոլ Փաշինեան ընդունած է Հայաստանի մէջ հաւատարմագրուած Եւրոպական Միութեան անդամ պետութիւններու դեսպանները։ Հանդիպման մասնակցած է նաեւ ՀՀ–ի մէջ ԵՄ պատուիրակութեան ղեկավար, դեսպան Վասիլիս Մարակոսը։
Դեսպան Մարակոս շնորհաւորած է վարչապետ Նիկոլ Փաշինեանը 2026-ի Յունիս 7-ին Հայաստանի մէջ տեղի ունեցած համապետական խորհրդարանական ընտրութիւններու արդիւնքներուն առիթով։ Ընդգծուած է Եւրոպական Միութեան պատրաստակամութիւնը՝ շարունակելու սերտ համագործակցութիւնը Հայաստանի հետ՝ ի նպաստ ժողովրդավարական արժէքներու ամրապնդման, կայունութեան եւ զարգացման։
Վարչապետ Փաշինեան շնորհակալութիւն յայտնած է Եւրոպական Միութեան եւ անդամ պետութիւններուն՝ ընտրութիւններուն առիթով հնչեցուած գնահատականներուն եւ շնորհաւորանքներուն համար։ Վարչապետը ընդգծած է Հայաստանի ժողովրդավարական գործընթացներուն եւ բարեփոխումներու օրակարգի յառաջմղման Եւրոպական Միութեան աջակցութեան կարեւորութիւնը։
Հանդիպման ընթացքին քննարկուած են Հայաստան-Եւրոմիութիւն համագործակցութեան օրակարգին վերաբերող հարցեր։ Միտքեր փոխանակուած են բարեփոխումներու օրակարգին, իրաւունքի գերակայութեան ամրապնդման, տնտեսական համագործակցութեան, ենթակառուցուածքներու զարգացման, ուժանիւթային դիմակայունութեան, ինչպէս նաեւ տարածաշրջանային կայունութեան եւ խաղաղութեան օրակարգին շուրջ։
Անդրադարձ կատարուած է Հայաստան-Եւրըմիութիւն գործընկերութեան հետագայ խորացման ուղղուած քայլերուն։ Կարեւորուած է բարձր մակարդակի քաղաքական երկխօսութեան շարունակականութիւնը եւ փոխգործակցութեան ընդլայնումը փոխադարձ հետաքրքրութիւն ներկայացնող բոլոր ոլորտներուն մէջ։
***
Եւրոպական Յանձնաժողովի նախագահ Ուրսուլա վոն տեր Լայեն Յուլիս 2-ին աշխատանքային այցով պիտի ժամանէ Հայաստան:
