Կիրակի, Հոկտեմբեր 15ևի երեկոյան Սոցիալ Դեմոկրատ Հնչակեան Կուսակցութեան Կլէնտէլի գրասենեակէն ներս հիւրընկալուեցաւ Թուրքիոյ խորհրդարանի հայ նախկին անդամ Կարօ Փայլանը: Հանդիպումին ներկայ էին ՍԴՀԿ կեդրոնական վարչութեան, Արեւմտեան Ամերիկայի Վարիչ Մարմինի եւ Հայ Ամերիկեան Խորհուրդի անդամներ:
ՍԴՀԿ Կեդրոնական Վարչութեան ատենապետ Տոքթ. Համբիկ Սարաֆեան ողջունելով Կարօ Փայլանին շեշտեց որ, անոր տեսակէտները՝ Հայաստանի ու հայութեան վերաբերող հարցերու շուրջ կը համընկնին Հնչակեան Կուսակցութեան տեսակէտներուն հետ:
Կարօ Փայլան իր ներկայացուց իր գնահատականները Հայաստանի դիմագրաւած ներկայի մարտահրաւէրներու կապակցութեամբ« յայտնելով թէ վտանգները լուրջ են եւ անհրաժեշտ է, որ հայութիւնը այս հանգրուանին համախմբուի եւ զօրաշարժի ենթարկուի:
Երկուստեք յայտնուեցաւ այն կարծիքը, որ կարելի չէ ամբողջութեամբ ապաւինիլ այլ պետութիւններու վրայ եւ պէտք է ունենալ հզօր բանակ պաշտպանելու համար Հայաստանի ինքնիշխան տարածքը:
Կարեւոր նկատուեցաւ նաեւ Հայաստանի ժողովրդավար դիմագիծի պահպանումը:
Կարօ Փայլան տեղեկացուց որ, ինք մասամբ հաստատուած է Ուաշինկթըն՝ քաղաքական շրջանակներուն հետ շփումները զարգացնելու նպատակով: