Վարչապետ Նիկոլ Փաշինեան ու Պելճիքայի արտաքին գործերու նախարար Հաճա Լահպիպին այսօր կայացած հանդիպման ընթաքին անդրադարձած են Ատրպէյճանի կողմէ Լաչինի միջանցքի ապօրինի արգելափակման հետեւանքով Լեռնային Ղարաբաղի մէջ մարդասիրական ճգնաժամի խորացման:
Վարչապետի աշխատակազմին փոխանցմամբ՝ Փաշինեան ընդգծած է, որ Ատրպէյճանի գործողութիւններուն նպատակն է ԼՂ-ի մէջ իրականացնել ցեղային զտում: Ան կարեւորած է ԼՂ-ոի մէջ ստեղծուած իրավիճակին վերաբերեալ ՄԱԿ Անվտանգութեան Խորհուրդին մէջ տեղի ունեցած հրատապ քննարկումները եւ Ատրպէյճանի քայլերուն նկատմամբ միջազգային գործընկերներու հասցեական արձագանգը: Վարչապետը շեշտած է գործուն քայլեր ձեռնարկելու անհրաժեշտութիւնը՝ Ատրպէյճանի գործելաոճը փոխելու համար, ինչպէս նաեւ կարեւորած է Պրիւքսէլի մէջ Հայաստանի եւ Ատրպէյճանի միջեւ տեղի ունեցած բանակցային գործընթացին մէջ մինչ այժմ ձեռք բերուած պայմանաւորուածութիւններու իրականացման հարցով հետեւողականութեան անհրաժեշտութիւնը:
Պելճիքայի արտաքին գործերու նախարարը ընդգծած է իր երկրին աջակցութիւնը Եւրոպական Միութեան դիրքորոշման, ըստ որուն՝ Ատրպէյճանը պէտք է ապահովէ Լաչինի միջանցքով մարդոց եւ բեռներու ազատ տեղաշարժը եւ իրականացնէ ՄԱԿ Արդարադատութեան Միջազգային Դատարանին կողմէ ընդունուած որոշումը:
Վարչապետ Փաշինեան կարեւորած է տիկին Լահպիպի այցը Հայաստան եւ ողջունած է Պելճիքայի կառավարութեան՝ Հայաստանի մէջ դեսպանութիւն բանալու որոշումը, ինչ որ պիտի նպաստէ ոչ միայն քաղաքական, այլ նաեւ տնտեսական ու մշակութային ոլորտներուն մէջ փոխգործակցութեան ընդլայնման:
Հաճա Լահպիպի խօսքով՝ իր այցին նպատակն է նոր լիցք հաղորդել հայ-պելճիքական յարաբերութիւններուն, այդ շարքին՝ տնտեսութեան ու ներդրումներու ոլորտին մէջ: Ան յաւելած է, որ պելճիքացի գործարարներու շրջանակին մէջ առկայ է Հայաստանի մէջ ներդրումային ծրագրեր իրականացնելու եւ առեւտրային կապերը խորացնելու մեծ հետաքրքրութիւն: