Հայաստանի ու Ռուսիոյ վարչապետներ Նիկոլ Փաշինեանն ու Միխայիլ Միշուսթինը Սոչիի մէջ բանակցութիւններ վարած են:
Հանդիպման սկիզբը Ռուսիոյ կառավարութեան ղեկավարը Նիկոլ Փաշինեանին, ինչպէս նաեւ ՀՀ նախագահ Վահագն Խաչատրեանին փոխանցած է Ռուսիոյ նախագահ Վլատիմիր Փութինի ողջոյնները:
«Մենք անկեղծօրէն կը գնահատենք մեր եղբայրական յարաբերութիւնները, անոնք ռազմավարական եւ դաշնակցային բնոյթ կը կրեն», ընդգծած է Ռուսիոյ կառավարութեան ղեկավարը:
Նիկոլ Փաշինեան, իր հերթին, բարձր գնահատած է երկու երկիրներու յարաբերութիւններու զարգացման աշխուժութիւնը եւ, մասնաւորապէս, գործարար համագործակցութիւնը: Ան նաեւ ուշադրութիւն հրաւիրած է փոխադարձ առեւտուրի եւ ներդրումային աշխուժութեան աճին վրայ:
«Մենք շատ լաւ ընթացք ունինք, եւ ես շատ ուրախ եմ, որ ռուսական առեւտուրը Հայաստանի մէջ լաւ վիճակի մէջ է: Նախորդ տարի մենք քննարկած ենք, թէ ինչպէս կարելի է աշխուժացնել տնտեսական կապերը, եւ նայելով արդիւնքներուն` ես կ’արձանագրեմ, որ այն, ինչի մասին մենք խօսած ենք, մեծ մասամբ կեանքի կոչուած է», արձանագրած է Միշուսթին:
Սոչիի մէջ կ’ընթանայ Եւրասիական Միջկառավարական Խորհուրդի եւ ԱՊՀ կառավարութիւններու Ղեկավարներու Խորհուրդի նիստը:
Միխայիլ Միշուսթին նշած է Միջկառավարական Յանձնաժողովի արդիւնաւէտ աշխատանքը, որուն շնորհիւ կ’ընդլայնի Ռուսիոյ եւ Հայաստանի միջեւ գործընկերութիւնը:
Ռուսիա շահագրգռուած է նոր համատեղ նախագիծեր սկսիլ ուժանիւթի, հանքարդիւնաբերութեան, թուայնացման եւ գիւղատնտեսութեան արդիւնաբերութեան ոլորտներուն մէջ, ըսած է Ռուսիոյ վարչապետը:
Ան նաեւ շեշտած է, որ Ռուսիոյ, Հայաստանի եւ Ատրպէյճանի ղեկավարներու պայմանաւորուածութիւններուն համապատասխան` համակարգուած աշխատանք կը տարուի Անդրկովկասի մէջ տնտեսական եւ փոխադրութեան կապերու ապաշրջափակման ուղղութեամբ, կը ստեղծուին ենթակառուցուածքային նոր ուղիներ:
Հայաստանի վարչապետը նշած է այն շօշափելիյ առաջընթացը, որ, իր կարծիքով, ձեռք բերուած է վերջին հանդիպման ժամանակ: Նիկոլ Փաշինեան ընդգծած է Հայաստանի պատրաստակամութիւնը` շարունակելու նման աշխատանքը եւ իրականացնելու ձեռք բերուած պայմանաւորուածութիւնները