Հնդկաստանի մայրաքաղաքին մէջ մեկնարկած միջազգային համաժողովի ծիրին մէջ առանձնազրոյց ունեցած են Հայաստանի եւ Ռուսիոյ արտաքին գործերու նախարարները:
Ռուսիոյ արտաքին գերատեսչութեան փոխանցմամբ, Արարատ Միրզոյեանն ու Սերկէյ Լաւրովը հայ-ատրպէյճանական կարգաւորման բոլոր ուղիներուն մէջ ջանքերու աշխուժացման հրատապութեան հարցը կարեւորած են` Ռուսիոյ, Հայաստանի եւ Ատրպէյճանի ղեկավարներու պայմանաւորուածութիւններուն համաձայն:
«Հաստատուած են միջազգային հարթակներու, ընդհանուր համարկման միաւորումներու շրջանակներուն մէջ համագործակցութիւնը յառաջ մղելու մօտեցումները: Միտքեր փոխանակուած են տարածաշրջանային խնդիրներու շուրջ», նշուած է հաղորդագրութեան մէջ:
Երկու նախարարներուն հանդիպումը անցած է մամուլի համար փակ դռներու ետին: Ռուսական կողմի կարճ հաղորդագրութեան մէջ կ’ընդգծուի, որ բանակցութիւնները ընթացած են բարեկամական եւ վստահելի մթնոլորտի մէջ, պայմանաւորուածութիւն ձեռք բերուած է դիւանագիտական առումով հետագայ շփումներուն վերաբերեալ:
Պաշտօնական Երեւանը Լաւրով-Միրզոյեան հանդիպման մասին աւելի ուշ հաղորդեց` նշելով, որ արտաքին գործերու նախարարները անդրադարձած են Հայաստան-Ատրպէյճան յարաբերութիւններու կարգաւորման, սահմանազատման եւ սահմանային անվտանգութեան, տարածաշրջանին մէջ տնտեսական եւ ճանապարհային կապերու ապաշրջափակման, Լեռնային Ղարաբաղի հիմնախնդիրին:
Նիւ Տելհիի մէջ Հայաստանի արտաքին գործերու նախարարը հանդիպած է նաեւ Եւրոմիութեան արտաքին գործերու եւ անվտանգութեան քաղաքականութեան հարցերով բարձր ներկայացուցիչ Ժոզեփ Պորէլի հետ: