Իրաւապահները մեղադրանք առաջադրած են անցեալ շաբաթ ձերբակալուած երկու դաշնակցականներուն եւ կուսակցութեան համակիրին` Արարատի մարզի բնակիչներուն վարչապետի հրաժարականի պահանջով անցեալ տարուայ բողոքի շարժումներուն մասնակցելուն հարկադրելու համար:
Գործը յարուցուած է ամրան լրատուամիջոցներէն մէկուն հրապարակած «ՀՅԴ-ականները կը շարունակեն փողով մարդ բերել» վերնագրով ձայնագրութեան հիման վրայ:
Մեղադրեալներէն կուսակցութեան Արարատի մարզային կառոյցի անդամ Գառնիկ Մանուկեանը կալանաւորուած է, կը հաղորդէ Քննչական Կոմիտեն: Միւս երկուքը ազատութեան մէջ են:
Ըստ քննիչներուն` Մանուկեանը, ինչպէս նաեւ դաշնակցական Արտաւազդ Մարգարեանը, կուսակցութեան համակիր Յունան Մելքոնեանը գումար տուած են, որ արարատցիները ընդդիմութեան շարժումներուն մասնակցին: Թէ որքան գումար տրուած է, իրաւապահները չեն մանրամասներ:
Իրաւապահները նաեւ կը պնդեն, որ խուզարկութիւններու բերումով առգրաւած են «Հայաստան Դաշինք» գրառմամբ 2 թղթապանակ` 100-է աւելի թուղթերով, որոնց վրայ ցուցակի տեսքով, մեծամասամբ ձեռագիր գրուած են անուն-ազգանուններ, դիմացը նշուած «առաւել» կամ «նուազ», բացակայ եւ այլ նշումներ, հեռախօսահամարներ, անձնագրի թիւեր ստորագրութիւններով, «բարգաւաճ», «պիտի չնտրեն», «հանուած է», «չգրել», «չզանգել», «մտնել», «չմտնել», ինչպէս նաեւ գումար վերցնելու, չվերցնելու վերաբերեալ նշումներ:
