Իշխանութիւնը առաջին անգամ ամենաբարձր մակարդակով կը յայտարարէ, որ Հայաստանին կը ստիպեն իր ինքնիշխան տարածքով միջանցք տրամադրել Ատրպէյճանին, ինչպէս նաեւ անդամակցիլ Ռուսիա-Պելառուսիա ձեւաւորուող միութենական պետութեան:
Անվտանգութեան Խորհուրդի քարտուղար Արմէն Գրիգորեան Հանրայինի եթերով յայտարարեց, որ Սեպտեմբեր 13-ին Պաքուի կողմէ Հայաստանի ինքնիշխան տարածք ներխուժումը, ինչպէս նաեւ Լաչինի միջանցքի փակումը Հայաստանի վրայ բանեցուող ճնշումներու ծիրին մէջ են: Գրիգորեանի պնդմամբ` վերջին շրջանին վառ արտայայտուող հայ-ռուսական յարաբերութիւններու ճգնաժամի հիմնական պատճառը սա է:
«Այդ լայն բնաբանը, այսպէս ասած, Ատրպէյճանին աջակցելու, Հայաստանի տարածքով այսպէս կոչուած միջանցքային տրամաբանութեան որեւէ ճանապարհ ստանալու ծիրին մէջ է: Հայաստանը շարունակում է դիմադրել սրան: Ի դէպ, կարող եմ յստակ ասել, որ Սեպտեմբերի 13-ի սրացումը նաեւ փոխկապակցուած է սրա հետ, եւ ամբողջ ճգնաժամի հենքը կամ դրդապատճառը հիմնական սա է», յայտնեց Գրիգորեան:
Անվտանգութեան Խորհուրդի քարտուղարը նաեւ առաջին անգամ հաստատեց իշխանական որոշ պատգամաւորներու շուրթերով հնչող այն պնդումը, որ Ռուսիան կը ստիպէ Հայաստանին անդամակցիլ միութենական պետութեան: Գրիգորեան պնդեց, որ Հայաստան կը դիմադրէ ռազմավարական դաշնակիցի այդ ցանկութեան եւ պատասխան կը ստանայ ռազմական ճնշումներու ձեւով: