«Քարնեկի» հիմնադրամի առաջատար վերլուծաբան, Ղարաբաղեան հակամարտութեան գիտակ Թոմաս տը Վաալ կ’ընդգծէ, որ Միացեալ Նահանգները դրական դեր կը խաղայ Հայաստանի դէմ Ատրպէյճանի նոր յարձակումները զսպելու գործին մէջ:
«Դրական է, որ մենք տեսած ենք Ուաշինկթընի, կարելի է ըսել, արտաքին քաղաքականութեան ոլորտի երկու բարձրաստիճան պաշտօնեաներու` Էնթընի Պլինքընի եւ Ճէյք Սալիվանի անձնական ներգրաւուածութիւնը: Քանի մը ամիս առաջ տեսանք նաեւ Ուիլիըմ Պըրնզի բաւական խորհրդաւոր այցելութիւնը. գուցէ այդ ուղղակի կապուած չէր հակամարտութեան հետ, բայց ան անշուշտ մէկն է, որ բաւական լաւ կը հասկնայ այդ հարցը: Նշեմ նաեւ, որ ան իմ նախկին ղեկավարս է, «Քարնեկի» հիմնադրամի նախկին նախագահն է», ըսաւ Տը Վաալ «Ազատութեան» «Կիրակնօրեայ վերլուծական Հրայր Թամրազեանի հետ» հաղորդման եթերով:
«Այնպէս որ, ամերիկացիները գիտեն այս հարցը, կեդրոնացած են անոր վրայ», նշեց վերլուծաբանը` շարունակելով. «Անոնց լծակները այնքան ալ հզօր չեն, բայց կը կարծեմ, անշուշտ, ամերիկացիները կը հասկցնեն, որ իրենց մեծապէս պիտի զայրացնէ, եթէ Ատրպէյճանի կողմէ ռազմական գործողութիւն ըլլայ»:
Տը Վաալը վստահ չէ, թէ այդ լուրջ ռազմական գործողութիւն պիտի ըլլայ` «Ալիեւը իր ռազմական գործողութիւնները սահմանափակեց փոքր ծաւալով». «Մենք այդ տեսանք գարնան` Ղարաբաղի մէջ, տեսանք Օգոստոսին` Լաչինի շրջանին մէջ, եւ տեսանք 2020 թուականէն յետոյ ամենալուրջ այս մարտական գործողութիւնները Սեպտեմբերին: Այսպիսով` մարտական գործողութիւնները միշտ տեւած են երկու-երեք օր, իսկ յետոյ` դադար: Կը կարծեմ, թէ այդ ինքնին վատ է, քանի որ կը թուլացնէ խաղաղ գործընթացը, կը խաթարէ կարգաւորման հնարաւորութիւնները, եւ ի հարկէ` հիմնականին մէջ այն պատճառով, որ մարդիկ կը զոհուին: Բայց ես չեմ կարծեր, որ մենք նոր լայնածաւալ պատերազմի շեմին ենք, եւ այստեղ, կը կարծեմ, միջազգային հակազդեցութիւնը ուժեղ պիտի ըլլար»:
Ան ընդգծեց, որ «նաեւ ռուսերը կան գետնի վրայ` անոնք ե՛ւ Հայաստանի մէջ են, ե՛ւ Ղարաբաղի մէջ. «Այնպէս որ, եթէ իրավիճակը աւելի լրջանայ, ապա Ռուսիան դժկամութեամբ, բայց պիտի ներքաշուի հակամարտութեան մէջ որպէս Հայաստանի ռազմական դաշնակից»:
«Խօսքը աւելի շատ Ատրպէյճանի կողմէ ուժի ու դիւանագիտութեան այս համադրութեան մասին է, որ ան կ’օգտագործէ, որպէսզի փորձէ հասնիլ նախագահ Ալիեւի պատկերացուցած արդիւնքներուն», ըսաւ Տը Վաալ: