Հայաստանի արտաքին գործերու նախարար Արարատ Միրզոյեանը, Ֆրանսայի նախագահի գրասենեակի խորհրդական Իզապէլ Տիւմոնը ու ԵԱՀԿ Մինսքի Խումբի Ֆրանսայի համանախագահ Պրիս Ռոքֆօն քննարկած են տարածաշրջանային եւ միջազգային օրակարգի հարցեր:
Հայաստանի Արտաքին Գործերու Նախարարութեան փոխանցմամբ, անդրադարձ կատարուած է Հայաստան-Ատրպէյճան խաղաղութեան պայմանագրին, Լեռնային Ղարաբաղի հիմնախնդիրի կարգաւորման վերաբերող հարցերուն, միտքեր փոխանակած են Հոկտեմբեր 6-ին Փրակի մէջ տեղի ունեցած քառակողմ հանդիպման վերաբերեալ:
«Ընդգծուել է ատրպէյճանական զինուած ուժերի` ՀՀ ինքնիշխան տարածքից անյապաղ դուրսբերման անհրաժեշտութիւնը, հայ ռազմագերիների հայրենադարձման, ինչպէս նաեւ սահմանային իրավիճակի մշտադիտարկման եւ վերահսկման միջազգային մեխանիզմների ներդրման կարեւորութիւնը: Այս ծիրին մէջ քննարկուել են ԵՄ քաղաքացիական առաքելութեան վերաբերեալ ձեռք բերուած պայմանաւորուածութեանը եւ առաքելութեան աշխատանքներին առնչուող հարցեր», ըսուած է ԱԳՆ տարածած հաղորդագրութեան մէջ:
Հայաստանի արտաքին գործերու նախարարը կարեւորած է ատրպէյճանական վերջին յարձակման վերաբերեալ ֆրանսական կողմի սկզբունքային դիրքորոշումը եւ Հարաւային Կովկասի մէջ կայունութեան ու անվտանգութեան հաստատման ուղղութեամբ Ֆրանսայի ներդրած ջանքերը:
Աւելի ուշ զանոնք ընդունած է վարչապետ Նիկոլ Փաշինեանը: Ըստ կառավարութեան` կարեւորուած է ՄԱԿ-ի կանոնադրութեան եւ 1991 թուականի Ալմա-աթայի հռչակագրի հիման վրայ Հայաստանի ու Ատրպէյճանի միջեւ խաղաղութեան պայմանագրի մշակման, ինչպէս նաեւ սահմանազատման աշխատանքներու իրականացման ու հայ-ատրպէյճանական սահմանին Եւրոմիութեան քաղաքացիական առաքելութեան գործունէութեան ապահովումը: