Սահմանադրական դատարանի նախկին նախագահ, ՍԴ դատաւոր Հրայր Թովմասեանն ու անոր փոխկապակցուած անձեր` կինը` Լամարա Խուտաւերտեանը, դուստրերը` Մէրի եւ Գոհար Թովմասեանները, ինչպէս նաեւ սոյն գործով այլ անձեր` քենին` Սոնա Խուտաւերտեանը, ու անոր ամուսինը` Ռուսիա բնակող գործարար Ռուբիկ Ղազարեանը, հրաւիրուած են ՀՀ Դատախազութեան ապօրինի ծագում ունեցող գոյքի բռնագանձման գործերով վարչութիւն: Յիշեալ անձեր Դատախազութեան վերոյիշեալ վարչութիւն պէտք է ներկայանան Սեպտեմբեր 7-ին:
Յիշեցնենք, որ ՍԴ դատաւոր Հրայր Թովմասեանի դէմ յեղափոխութենէն յետոյ քրէական գործեր յարուցուեցան: Ըստ 2019-ին յարուցուած քրէական գործի մեղադրական եզրակացութեան` Հրայր Թովմասեանը կը մեղադրուի անով, որան 2010 թուականի Դեկտեմբեր 17-էն մինչեւ 2014 թուականի Ապրիլ 3 ինկած ժամանակահատուածին զբաղեցնելով ՀՀ արդարադատութեան նախարարի պաշտօնը եւ օժտուած ըլլալով կազմակերպական-տնօրինչական, կարգադրիչ լիազօրութիւններով, շահադիտական եւ անձնական այլ շահագրգռուածութենէն ելլելով պաշտօնէական դիրքը ծառայութեան շահերուն հակառակ օգտագործելով, նոյն նախարարութեան խումբ մը պաշտօնատար անձերու հետ յանցակցութեամբ խոչընդոտած է նոտարներու կողմէ իրենց գործունէութեան վայրի` Երեւան քաղաքի Բաղրամեան պողոտայի 1-ին փակուղիի 14-րդ շէնքի 162-րդ հասցէին գտնուող տարածքին նկատմամբ անհատոյց օգտագործման իրաւունքը իրացնելու գործընթացին, որով էական վնաս պատճառուած է ՀՀ Արդարադատութեան Նախարարութեան, նոտարներու իրաւունքներուն ու օրինական շահերուն, ինչպէս նաեւ անզգուշութեամբ յառաջացուցած է գոյքային վնասի տեսքով ծանր հետեւանքներ: Բացի անկէ, Հրայր Թովմասեանը, նոյն շահագրգռուածութեամբ, պաշտօնէական դիրքը ծառայութեան շահերուն հակառակ օգտագործելով, նոյն նախարարութեան խումբ մը պաշտօնատար անձերու հետ համակցութեամբ հարկադրուած է ՀՀ Նոտարական պալատի նախագահին` պալատին համար ակնյայտ ոչ-ձեռնտու պայմաններով վարձակալել փաստացի իրեն պատկանող, Երեւան քաղաքի Ալեք Մանուկեան 8/1 շէնքի 1-ին յարկը գտնուող անշարժ գոյքը, որով էական վնաս պատճառուած է ՀՀ Արդարադատութեան Նախարարութեան եւ ՀՀ Նոտարական պալատի օրինական շահերուն, ինչպէս նաեւ անզգուշութեամբ յառաջացուցած է գոյքային վնասի տեսքով ծանր հետեւանքներ:
Այս գործով միւս ամբաստանեալը ՀՀ Արդարադատութեան Նախարարութեան օրինականութեան վերահսկողութեան տեսչութեան նախկին պետն է, ՍԴ նախագահ Հրայր Թովմասեանի սանիկ Նորայր Փանոսեանը: Վերջինիս առաջադրուած մեղադրանքը եւս այս դրուագներուն վերաբերեալ է:
Նշենք, որ Fip.am-ի կողմէ Կադաստրի Կոմիտէէն ձեռք բերուած փաստաթուղթերուն համաձայն` խնդրոյ առարկայ տարածքը 2009-էն կը պատկանի Թովմասեանի կնոջ` Լամարա Սամատի Խուտաւերտեանի քրոջ` Սոնա Խուտաւերտեանին, եւ վերջինիս ամուսնուն` Ռուբիկ Ղազարեանին:
Վերջիններս, ըստ Հրայր Թովմասեանի, 1980-ականներէն Հայաստան չեն բնակիր: Անոնք արձանագրուած են Ռուսիոյ Դաշնութեան Ալթայի երկրամասի Պարնաուլ քաղաքին մէջ:
Յատկանշական է, որ տարածքի առքուվաճառքի ժամանակ որպէս վաճառող լիազօրուած անձ հանդէս եկած է նոյնինքն Հրայր Թովմասեանը:
Իսկ վաճառողը 131 քմ տարածքը Թովմասեանի բարեկամներուն վաճառած է ընդամէնը 3 միլիոն դրամով (մօտ 8 հազար տոլար): Այդ տարածքը 2012-2014 թուականներուն վարձակալած է «Նոտարական պալատը», որ կը վերահսկուի Արդարադատութեան Նախարարութեան կողմէ: Պալատը 3 միլիոն դրամով ձեռք բերուած տարածքի վարձակալութեան համար ամսական վճարած է 300.000 դրամ, այնինչ այն 2016-ի Օգոստոսէն վարձակալութեան յանձնուած է ամսական ընդամէնը 85.000 դրամով:
Այսինքն` Հրայր Թովմասեանի` արդարադատութեան նախարարի պաշտօնը զբաղեցուցած տարիներուն Նոտարական պալատը Հ. Թովմասեանի քենեկալէն այդ տարածքը վարձակալած է շուկայական արժէքէն մօտ 3.5 անգամ թանկ:
Նշենք, որ սոյն քրէական գործով դատական վերջին նիստը նշանակուած էր Սեպտեմբեր 1-ին:
