«Սուրմալու» առեւտուրի կեդրոնին մէջ տեղի ունեցած պայթումի դէպքին առթիւ նախաձեռնուած քրէական վարոյթով ձերբակալուած 4 անձերը կը հանդիսանան փոխտնօրէնը, վարձակալն ու պահեստը շահագործող անձեր: Այս մասին Civic.am-ի հետ զրոյցին ըսաւ Քննչական Կոմիտէի մամուլի խօսնակ Վարդան Թադեւոսեանը` յաւելելով. «Հրդեհային անվտանգութեան կանոնները կամ պահանջները խախտելու հիմքով ձերբակալուել են փոխտնօրէնն ու վարձակալը, իսկ անզգուշութեամբ երկու կամ աւելի անձանց կեանքից զրկելու հիմքով` պահեստը շահագործող անձինք»: Ան նաեւ նշեց, որ նախաքննութեան ընթացքին հարցաքննութեան ենթարկուած են նաեւ Քաղաքաշինութեան, տեխնիկական եւ հրդեհային անվտանգութեան տեսչական մարմինէն պաշտօնեաներ: Նախաքննութիւնը կը շարունակուի` պարզելու պայթումին բոլոր հանգամանքները:
Նշենք, որ սոյն թուականի Օգոստոս 14-ին` ժամը 13:30-ի սահմաններուն, Երեւան քաղաքի «Սուրմալու» առեւտուրի կեդրոնին մէջ տեղի ունեցած պայթումի դէպքին առթիւ նախաձեռնուած քրէական վարոյթով երկու անձի նկատմամբ քրէական հետապնդում յարուցուած է 357-րդ յօդուածի 2-րդ մասով (Հրդեհային անվտանգութեան կանոնները կամ պահանջները խախտելը, որ անզգուշութեամբ յառաջացուցած է մարդու մահ կամ այլ ծանր հետեւանք): Բացի անկէ, եւս երկու անձ ձերբակալուած է Քրէական Օրէնսգիրքի 165-րդ յօդուածի 2-րդ մասով (Անզգուշութեամբ երկու կամ աւելի անձեր կեանքէ զրկելը):
Յիշեցնենք, որ վերջին տուեալներով` «Սուրմալու» առեւտուրի կեդրոնին մէջ պայթումին հետեւանքով զոհուած է 16 մարդ, եւս մէկը կը համարուի անհետ կորսուած: Արտակարգ Իրավիճակներու Նախարարութիւնը յայտնած է, որ անհետ կորսուած մարդուն որոնողական աշխատանքները դադրեցուած են: