Միացեալ Նահանգները կրկին կը յայտարարէ, որ պատրաստ է շարունակելու աշխատանքը Ռուսիոյ հետ ԵԱՀԿ Մինսքի Խումբին մէջ` յանուն ղարաբաղեան խնդիրի համապարփակ ու խաղաղ կարգաւորման: Այդ մասին երէկ «Ազատութեան» տուած բացառիկ հարցազրոյցին խօսեցաւ Հայաստանի մէջ ԱՄՆ դեսպան Լին Թրէյսին:
«Մենք ըսած ենք, որ պատրաստ ենք Մինսքի Խումբը օգտագործել որպէս հարթակ: Այդ առաջարկը կը մնայ բաց: Մենք չենք լսած ռուս գործընկերներու արձագանգը այս առաջարկին: Բայց կը կարծեմ, որ այդ է առաջին քայլը, որմէ յետոյ մենք կրնանք խօսիլ այլ քայլերու եւ գաղափարներու մասին», ըսաւ դեսպանը:
Անցեալ ամիս ալ Միացեալ Նահանգներու պետական փոխքարտուղար Քերըն Տոնֆրիտ «Ազատութեան» տուած հարցազրոյցին մէջ պնդած էր, որ չնայած ուքրանական ճգնաժամին` Ուաշինկթըն պատրաստ է ղարաբաղեան խնդիրին շուրջ շարունակելու համագործակցութիւնը Ռուսիոյ հետ: Ռուսիոյ Արտաքին Գործերու Նախարարութիւնը կասկածի տակ դրած էր այս հարցով Ուաշինկթընի անկեղծութիւնը. «Եռեակի աշխատանքին շատ հարցերու հասցուած է անդառնալի վնաս», յայտնած էր նախարարութեան խօսնակ Մարիա Զախարովան` պնդելով, որ Միացեալ Նահանգներն ու Ֆրանսան ուքրանական պատերազմէն յետոյ խզած են կապերը ռուս համանախագահին հետ: Ռուսական կողմի այս յայտարարութենէն մէկ ամիս անց, երէկ, Միացեալ Նահանգներու դեսպանը վերստին պնդեց, որ կը սպասեն Ռուսիոյ վերադարձին:
«Առաջին քայլը կ’ակնկալենք Ռուսաիայէն, եւ այդ Ռուսիոյ վերադարձն է այս ձեւաչափին իր մասնակցութեան: Մենք կը շարունակենք Մինսքի Խումբը դիտարկել որպէս ձեւաչափ, հարթակ, որ ունի միջազգային մանտաթ` անդրադառնալու Լեռնային Ղարաբաղի իրավիճակին», ընդգծեց Լին Թրէյսին:
Արձագանգելով «Ազատութեան» հարցին, թէ Միացեալ Նահանգները ինչպէ՞ս կը վերաբերի Ատրպէյճանի նախագահի պնդումներուն, թէ հակամարտութիւնը այլեւս կարգաւորուած է, եւ միջնորդներու կարիքը չկայ, դեսպան Թրէյսին ընդգծեց, որ չնայած այդ յայտարարութիւններուն` Ուաշինկթըն պիտի շարունակէ ուղիներ փնտռել Մինսքի Խումբին ձեւաչափը օգտագործելու համար:
«Չնայած Ռուսիոյ պատերազմին Ուքրանիոյ դէմ, որ մեծ ուշադրութիւն գրաւած է աշխարհի մէջ, Միացեալ Նահանգները շատ կեդրոնացած է նաեւ այս տարածաշրջանին մէջ ստեղծուած իրավիճակին, Հայաստանի եւ Ատրպէյճանի միջեւ ստեղծուած իրավիճակին վրայ: Կը կարծեմ, թէ այդ արտացոլուած է հեռախօսազանգերու, շփումներու մէջ, որոնք մենք տեսած ենք այս վարչակազմի` իշխանութիւն ստանձնելէ ի վեր: Այդ ցոյց կու տայ Միացեալ Նահանգներու, պետական քարտուղարին յանձնառութիւնը` փորձել խուսափիլ հակամարտութիւններու վերադարձէն, քննարկումները պահել ուշադրութեան կեդրոնին, արձանագրել յառաջընթաց, եւ ընել այդ դիւանագիտական ճանապարհով», նշեց ԱՄՆ դեսպանը:
