Երեւանը եւ Պաքուն յաջողած են մօտեցնել դիրքորոշումները սահմանային եւ մաքսային հսկողութեան բազմաթիւ հարցերու շուրջ, ըսած է Հայաստանի փոխվարչապետ Մհեր Գրիգորեանը` կառուցողական որակելով Հարաւային Կովկասի մէջ ճանապարհային հաղորդակցութեան կապերու ապաշրջափակման եռակողմ աշխատանքային խումբին գործունէութիւնը:
Ըստ Գրիգորեանի, մասնաւորապէս, այս պահին փորձագիտական ենթախումբերը կը շարունակեն աշխատիլ մայրուղիներու եւ երկաթուղային ենթակառուցուածքներու վերականգնման եւ հետագայ օգտագործման հետ կապուած հարցերուն վրայ: Այլ մանրամասնութիւններ Մհեր Գրիգորեանը չէ փոխանցած:
Ի տարբերութիւն փոխվարչապետին, որ կառուցողական կ’որակէ եռակողմ խումբին աշխատանքը ու կը խօսի համաձայնութիւններու մասին, վարչապետ Փաշինեան օրեր առաջ 3,4 ժամ երկարած ասուլիսին ընթացքին կը պնդէր, որ Ատրպէյճանը ապակառուցողական տրամադրուած է եւ կը փորձէ նոր պատերազմ հրահրելու օրինականութիւն ձեւաւորել: Որպէս ապացոյց վարչապետը պնդեց, որ Ատրպէյճան մերժած է Ռուսիոյ փոխվարչապետ Ալեքսէյ Օվերչուքի ներկայացուցած գրաւոր նախագիծը, որ հիմնուած եղած է Պրիւքսէլի մէջ ձեռք բերուած պայմանաւորուածութիւններուն վրայ:
«Պայմանաւորուածութիւն ենք ձեռք բերել, որ սկսում ենք երկաթուղու շինարարութիւնը եւ դրանից յետոյ Ատրպէյճանն, ըստ էութեան, հրաժարուեց այդ պայմանաւորուածութիւնից: Ինչպէ՞ս հրաժարուեց, դրանից յետոյ եղաւ առաջարկ ձեռք բերուած պայմանաւորուածութիւնները արձանագրել գրաւոր փաստաթղթով: Փաստաթղթի նախագիծը ներկայացրել էր փոխվարչապետ, եռակողմ աշխատանքային խմբի համանախագահող ռուսաստանեան կողմի Ալեքսէյ Օվերչուքը, հայկական կողմը պատրաստակամութիւն արտայայտեց ստորագրել այդ փաստաթուղթը, ատրպէյճանական կողմը հրաժարուեց այդ փաստաթղթից: Վերջերս էլ նաեւ հրապարակուեց, թէ Հայաստանի Հանրապետութիւնը ինչ յստակ առաջարկով է հանդէս եկել մայրուղիների եւ երկաթուղային ճանապարհների փաթեթային բացման վերաբերեալ, այդ առաջարկութիւնը հրապարկուեց, ատրպէյճանական կողմը մերժեց նաեւ այդ տարբերակը», նշած է վարչապետը:
